ՀՀ նախագահի նախկին թեկնածու, «Ազգային համաձայնություն» կուսակցության առաջնորդ Արամ Հարությունյանը այսօր հրավիրված ասուլիսում անդրադարձել է նախագահի նախկին թեկնածու Պարույր Հայրիկյանի սպանությունը պատվիրելու մեղադրանքով ձերբակալված նախագահի մեկ այլ թեկնածու Վարդան Սեդրակյանին։ Նա ընդգծել է, որ որևէ դրդապատճառ չի տեսնում, թե ինչու պետք է Վարդան Սեդրակյանը գնար այդ քայլին։

–Վարդան Սեդրակյանը որևէ ձևով չի տեղավորվում մահափորձի պատվիրատուի դերում,-ասել է Ա. Հարությունյանը՝ հումորով ավելացնելով,–վարորդը նաև հսկիչ է. կաֆելչիկը նաև քիլեր է։

Ինչ վերաբերում է պաշտոնական տվյալներով ՀՀ նախագահ վերընտրված Սերժ Սարգսյանին, բանախոսն ընդգծել է, որ նա տառապում է «ժողովրդի ատելություն» հիվանդությամբ և այդ ատելությունը երկողմանի է.

–Փետրվարի 18-ին յուրաքանչյուր ընտրող մահափորձ կատարեց Սերժ Սարգսյանի նկատմամբ, և այժմ նա քաղաքականապես անկողնային վիճակում է։ Եթե Րաֆֆի Հովհաննիսյանը վճռական չլինի, Սերժ Սարգսյանը կերկարացնի իր կյանքը «կեղծ ընդդիմություն» դեղամիջոցով։Սերժ Սարգսյանի թիմում բոլորը հասկացել են, որ նա իրավիճակին չի տիրապետում: Նաև խնդիր ունի, թե ով է լինելու իր իրավահաջորդը,քանի որ Սերժ Սարգսյանն այդքան ռեսուրս չունի, որ Հայաստանի չորրորդ նախագան իր մարդը լինի։

Ա. Հարությունյանի համոզմամբ՝ այսօր իշխանությունն ավելի թույլ է, քան 1996թ. Լևոն Տեր-Պետրոսյանն էր:

Նա նաև ավելացրել է, որ Րաֆֆի Հովհաննիսյանն իր պահանջները պետք է ձևակերպի հստակ, իսկ հանդիպումներն անցկացնի բաց.

–Մեկ է հիմա ամեն ինչ գաղտնալսվում է: Րաֆֆին նյարդայնացել էր, որ Սերժ Սարգսյանի հետ խոսակցությունը գաղտնալսվել է: Պարզ է չէ՞, որ Ծառուկյանի հետ ունեցած հանդիպումն էլ է գաղտնալսվել: Դրա համար կարևոր է, որ հանդիպումները լինեն բաց։ Նաև ուզում եմ հավատալ Րաֆֆի Հովհաննիսյանին, բայց հստակ քայլ եմ ուզում տեսնել, պետք է հստակ ձևակերպվի խնդիրը, հստակ խոսվի հրաժարականի մասին:

7or.am