Նույնիսկ Գյումրիում կան մարդիկ, հիմնականում պաշտոնյաներ ու ԱԺ պատգամավորներ, որոնք բանից անտեղյակ, կամ գուցե հանրապետական իշխանությունների աչքը մտնելու համար, պարբերաբար հայտարարում են, թե այս քաղաքում անօթևանության խնդիրը լուծված Է: Այդ մարդիկ ոչ միայն չեն տեսնում, այլ նաև չեն մտածում այն խարխուլ վագոն-տնակներում, վխտացող առնետների հարևանությամբ, խոնավ ու ցուտ պայմաններում մի կերպ գոյատևող իրենց համաքաղաքացիների մասին: Մինչդեռ Գյումրիում դեռևս 4000-4500 ընտանիք կա, որոնց մեծ մասը վաղուց կորցրել է երբևէ լուսավոր և քարե բնակարան ունենալու հույսը: Նրանց մեծ մասը տարաբնույթ պատճառներով ընդգրկված չէ պետության կողմից բնակարանային փոխհատուցման ենթակա անօթևանների հերթացուցակում: