Ստիպված եմ պատասխանել ՀՀ ոստիկանության լրատվության վարչության պետ Աշոտ Ահարոնյանի ֆեյսբուքյան գրառմանը, քանի որ այն լայնորեն տարածվեց լրատվամիջոցներով: 

Ես ընդունում եմ ի գիտություն, որ ոստիկանությունը Ծիծեռնակաբերդի հուշահամալիրի ճանապարհին տեղի ունեցած «միջադեպը» գնահատում է որպես «ծառայություն կատարող ոստիկանների կողմից հուշում՝ համալիրի տարածքում տեղաշարժվելու ուղու վերաբերյալ»: Հակառակ պարագայում դա կարող էր գնահատվել որպես ծառայություն կատարող ոստիկանի կողմից պրովոկացիայի անհաջող փորձ կամ պարտականությունների ոչ պատշաճ կատարման փաստ /տե՛ս համապատասխան տեսանյութը/: 

Հաջորդ խնդիրը, որը ես շատ ավելի կարևորում եմ, քան այս միջադեպը, ՀՀ ոստիկանության լրատվության վարչության պետ Ա․ Ահարոնյանի կողմից գրավոր խոսքի անթույլատրելի շեշտադրումներն են ՀՀ ԱԺ պատգամավորներ Նաիրա Զոհրաբյանի և Տիգրան Ուրիխանյանի վերաբերյալ: Պարոն Ահարոնյանին հաստատակամորեն խորհուրդ եմ տալիս մնալ ոստիկանական ծառայողի գիտակցված սահմաններում և այսուհետ մտքեր ձևակերպել ընդգծված հարգանքով՝ ՀՀ ԱԺ ցանկացած պատգամավորի հանդեպ, զերծ մնալ ավելորդ խանդավառությունից՝ ՀՀ ԱԺ ցանկացած պատգամավորի մասնագիտական կարողությունները քննարկելիս: Ցանկացած պետական ծառայողի, առավել ևս՝ ոստիկանի, պատիվ է բերում իր կարգավիճակին համապատասխան համեստությունն ու զսպվածությունը: 

Չեմ կարող չանդրադառնալ նաև ոստիկանության լրատվության վարչության պետի այն հիշեցմանը, որ ոստիկանները կատարում են իրենց գործառույթները բոլոր զանգվածային միջոցառումների ժամանակ: Սա շատ կարևոր է, և այդպես պե՛տք է լինի: Բայց, ցավոք, միշտ չէ, որ այդպես է: Ընդամենը նախօրեին ոստիկանության բարձրաստիճան ծառայողների աչքի առաջ ՀՀԿ Երևանի ավագանու անդամի գլխավորությամբ ծեծի էր ենթարկվում ilur.am լրատվական կայքի թղթակիցը /տե՛ս համապատասխան տեսանյութերը և հրապարակումները/: Այստեղ մենք գործ ունենք ոչ միայն ոստիկանին, այլև պարզապես բանական մարդուն անհարիր կեցվածքի հետ: 

Ոստիկանության հեղինակության բարձրացումը շատ կարևոր է պետության և հասարակության համար, և դա պետք է արվի ոչ թե ֆեյսբուքյան գրառումներով, այլ՝ երկար տարիների ընթացքում կատարած հետևողական ու սկզբունքային աշխատանքի միջոցով: 

Եվ վերջում՝ ես աղոթում եմ բոլոր ոստիկանների խաղաղ և անկողմնակալ ծառայության համար:

Էլինար Վարդանյան 
ՀՀ ԱԺ Մարդու իրավունքների հանձնաժողովի նախագահ