Ինչպես հաղորդում է «Bakililar.AZ» գործակալությունը, Ադրբեջանի նախագահ Իլհամ Ալիևը Սիրիայի նախագահ Բաշար ալ-Ասադի հետ հանդիպման ժամանակ անդրադարձել է նաև Ղարաբաղի հարցին։

Ալիևը նշել է, որ չնայած ավելի քան 15 տարի առաջ հայտարարվել է հրադադարի ռեժիմ, խնդիրը մինչև այժմ դեռևս չի կարգավորվել։
-Էթնիկական զտումների քաղաքականությունը և Ադրբեջանի նկատմամբ Հայաստանի «ռազմական ագրեսիան» հանգեցրել են նրան, որ մեր երկրի ավելի քան  20%-ն «օկուպացված» է, միլիոնավոր փախստականներ և վերաբնակեցվածներ կան,-ասել է Ադրբեջանի նախագահը։

Նա նշել է, որ Ադրբեջանը խնդրի կարգավորումը տեսնում է  միջազգային նորմերի սահմաններում։ Նրա խոսքերով՝ ԱՄՆ Գլխավոր ասամբլեայի որոշմամբ և Անվտանգության խորհրդի 4 բանաձևերի համաձայն՝ պահանջ է դրվում, որ Հայաստանի զինված ուժերն անվերապահորեն դուրս գան «բռնազավթած» տարածքներից։

-Այլ միջազգային կազմակերպությունների որոշումներն էլ են պաշտպանում մեր տեսակետը։ Պետք է վերջ դնել այդ «ագրեսիային» և վերականգնել Ադրբեջանի տարածքային ամբողջականությունը,-ասել է Իլհամ Ալիևը։
Նա նշել է, որ հակամարտության կարգավորումը հնարավոր է միայն տարածքային ամբողջականության սկզբունքի հիման վրա։

Ընդգծենք, որ վերջերս ՀՀ նախագահ Սերժ Սարգսյանի հրավերով Սիրիայի նախագահ Բաշար ալ-Ասադը երկօրյա պաշտոնական այցով ժամանել էր Հայաստան։ Հայաստնում նա հայտարարել էր. «Ազգերի ինքնորոշման իրավունքը, միջազգային որոշումների և օրենքների նկատմամբ հարգանքը, ինչպես նաև  իրավական կամքը՝ հիմնված երկխոսության կարևորության վրա, բավարար հիմք են՝աշխարհի բոլոր ճգնաժամերն ու հակամարտությունները կարգավորելու համար»։