-Մենք ասում ենք, թե ճիշտ ենք, և ողջ աշխարհը գիտի այդ մասին ու պետք է հասկանա: Բայց աշխարհն այդ մասին չգիտի,-խոսելով Ղարաբաղի հարցում հակամարտող կողմերի իրականացրած քարոզչության մասին՝ ասել է  բուլղարացի լրագրող Ցվետանա Պասկալևան։

Նա նշել է, որ  թվում է, թե Ադրբեջանցիների քարոզչությունն ամբողջովին հիմնված է ստի վրա, սակայն այն շատ կազմակերպված է իրականացվում։

-Ցավն այն է, որ այդ սուտն ավելի լայն տարածում ունի։ Հայկական կողմի քարոզչությունը պետք է լինի ավելի կենտրոնացված: Մի՛ վախեցեք այդ բառից։ Երբ հարցը վերաբերում է ազգային անվտանգությանը և ազգային հարցերին, քարոզչությամբ պետք է զբաղվի լավ կառույց,- նշել է բուլղարացի  լրագրողը:

Նրա խոսքերով՝ շատ երկրներում նույնիսկ Հայաստանի տեղը չգիտեն, և մի անգամ  ամերիկացի սենատորներից մեկն իրեն խնդրել է քարտեզի վրա ցույց տալ Հայաստանը և բացատրել, թե ինչի մասին է խոսքը:

-Հայաստանը պետք է միջազգային հանրությանը տեղեկացնի իրականության մասին, տարած հաղթանակի մասին։ Բայց դա գրեթե չի արվում,-հավելել է Պասկալևան։

Նա նշել է, որ նույնիսկ հայ երիտասարդները լավ չեն ճանաչում արդի հերոսներին:

-Նրանք շատ լավ կասեն, թե ով է եղել Անդրանիկը, Նժդեհը, Վարդան Մամիկոնյանը, սակայն չեն ճանաչում, ասենք, Բեկոր Աշոտին: Այս ուղղությամբ բավարար չափով աշխատանք չի իրականացվում, բայց պատմությունն այդ հերոսներով է կերտվում,- հավելել է Ցվետանա Պասկալևան։

7or.am