Բաց նամակ ՀՀ նախագահ Ս.Սարգսյանին
Երկրի այսօրվա և վաղվա օրով մտահոգ,
ՀՀ քաղաքացի` Գ. Իսրայելյանից
(մասնագիտությամբ տնտեսագետ)

Պրն. Նախագահ,
Դուք ինքներդ ԵԿՄ-ի համագումարում խոստովանեցիք, որ ժաղովրդի 80%-ը դեմ է կենսաթոշակային բարեփոխման այս խայտառակ օրենքին:
Նման պարագայում, դուք ինչո՞ւ եք բռնի ուժով, Ձեր իշխանական բոլոր լծակներն օգտագործելով ժողովրդի վզին փաթաթում այդ հակասահմանադրական, մարդու իրավունքները ոտնահարող օրենքը: Ձեր կարծիքով ժողովրդի 80%-ը «ախմա՞խ է», բան չի՞ հասկանում, մնացած 20%-ն է բանիմաց, խելացի ու նման «մարդասիրական» օրենք է ընդունել: Դուք չե՞ք զգում, որ ժողովրդի մեծամասնությանը հանում եք Ձեր դեմ, իշխանությունների դեմ: Դուք փորփրում եք մեղվի փեթակը: Զոռով ժողովրդին ոտքի եք հանում:
Ես զարմանում եմ, Ձեզ շրջապատող պաշտոնյաների մեջ, ձեր խորհրդականների շրջանում, չկա արդյո՞ք մի ողջամիտ մարդ, ժողովրդի մասին մտածող, ցավող, որպեսզի Ձեզ բացատրի այս տխրահռչակ օրենքի բացասական հետևանքները: Երկրում ստեղծվել է անկայուն իրավիճակ: Գնալով շատանում է երկրի իշխանավորներից դժգոհողների թիվը: Մի խաղացեք մարդկանց համբերության հետ:
Պրն. Նախագահ, ընտրությունների ժամանակ ես իմ ձայնը Ձեզ եմ տվել, գտնելով, որ առաջադրված թեկնածուներից դուք եք համեմատաբար հարմարը` կրելու այդ բեռը: Ես լավ եմ հասկանում, թե ինչ մեծ պատասխանատվություն է երկրի նախագահ լինելը. Մի ամբողջ ժողովրդի ճակատագրի պատասխանատվությունը վերցնել սեփական ուսերին:
Ձեզ ընտրելիս ես առաջնորդվել եմ այն մտքով, որ Դուք ժողովրդի ծոցից եք ելել, մասնակցել եք Արցախի ազատագրական պատերազմին, հայրենասեր և ժողովրդի մասին մտածող մարդ եք: Սակայն այժմ մտածում եմ, որ չարաչար սխալվել եմ: Գու՞ցե պաշտոնն է Ձեզ փոխել, սկսել եք այլ աչքով նայել ժողովրդին: Բայց չէ որ Դուք էլ ժողովրդի մի մասնիկն եք:
Պրն. նախագահ, ես Ձեզ կխնդրեի լսել ժողովրդի ձայնը. Ժողովուրդն իմաստուն է և նրա մեծամասնությունը դժվար թե սխալվի: Այս օրենքի մասին դեռևս իրազեկված չէ ժողովուրդը, բազմաթիվ հարցեր մնում են անպատասխան: Ենթադրենք մարդը մի օր դառնում է գործազուրկ: Այդ մարդը իրավունք չունի օգտվել իր կուտակած կենսաթոշակային գումարից, որպեսզի հոգա իր ընտանիքի կարիքները, մինչև նոր աշխատնք գտնելը: Ստացվում է, որ մարդու ընտանիքը տվյալ ժամանակահատվածում պետք է մնա անելանելի վիճակի մեջ, իսկ իր կուտակած փողերը ինչ-որ ֆոնդեր օգտագործեն ըստ իրենց հայեցողության: Նման դեպքերում մարդը երևի չհասի իր թոշակի տարիքին:
Մի բան ևս նշեմ. ՌԴ-ի պես հզոր պետությունը ևս կենսաթոշակային բարեփոխումներ է նախատեսում իրականացնել, բայց միայն 2015թ.ից: Առայժմ նրանց մոտ իրազեկման աշխատանքներ են տարվում. Հեռուստատեսությամբ և այլ ԶԼՄ-ներով մանրամասն տեղեկացնում են ընդունվելիք օրենքի մասին: Իսկ մեզ մոտ ինչ-որ հապճեպ, օրենքի ուժի մեջ մտնելուց մի քանի օր առաջ, նոր փոփոխություններ են մտցվում օրենքի մեջ, որոնց մասին ժողովուրդը չի իրազեկվում: Մի խոսքով, կենսաթոշակային նման բարեփոխումը մեր երկրի համար ժամանակավրեպ է: Իմ համոզմամբ պետք է առնվազն մեկ տարով հետաձգել այս օրենքի գործողությունը: Այդ ընթացքում կատարել անհրաժեշտ փոփոխութոյւններ օրենքում, ապա մանրամասն իրազեկել ժողովրդին, օրենքը դնել լայն հասարակական քննարկման և ելնել բացառապես քաղաքացու շահերից, որպեսզի մեր երկրում ապագայում մարդ իրեն իսկապես ապահով զգա և վայելի իր արժանապատիվ ծերությունը:
Պրն. նախագահ, ինչ վերաբերվում է գազի գնին: Դուք հայտարարեցիք նույն ամբիոնից, որ մեր երկիրը ստանում է սահմանի վրա աշխարհում ամենաէժան գազը: Այո, համաձայն եմ ձեզ հետ` սահմանի վրա: Իսկ ի՞նչ գնով է այդ նույն էժան ռուսական գազը տրվում ժողովրդին` կրկնակի թա՞նկ: Ինչո՞ւ, ինչպե՞ս է այդ գինը գոյանում: Իսկ եթե հաշվի առնենք նաև սպառվող գազի որակը(նակատի ունեմ ցածր կալորիականությունը), ուրեմն էլ ավելի թանկ է նստում գազը ժողովրդի վրա: Ես խնդրում եմ «թոզ» մի փչեք ժողովրդի աչքերին. ժողովուրդն ամեն ինչ շատ լավ հասկանում է:
Եվ վերջում, պրն. Նախագահ:
Դուք կոչված եք համախմբելու ժողովրդին, կայունացնելու երկրի քաղաքական իրավիճակը: Մենք շրջապատված ենք թշնամի հարևաններով: Մի Վրաստան է, որի հետ բարի դրացիական հարաբերություններ են, այն էլ նրանց նորընտիր նախագահն իր առաջին պաշտոնական այցելությունները կատարեց Ադրբեջան և Թուրքիա: Այստեղ մտածելու տեղ ունեն մեր արտաքին քաղաքականության համար պատասխանատու այրեյը:
Մի խոսքով, ես սթափվելու կոչ եմ անում ձեզ, պրն. նախագահ: Հուսով եմ իմ անհանգստությունները, մեր երկրի աշխարհաքաղաքական իրավիճակը, կախվածությունը շատ ու շատ հանգամանքներից Ձեզ սթափվելու և ժողովրդի մեծամասնության կողքին կանգնելու, ժողովրդին չպառակտելու, այլ համախմբելու կտանի: Չէ որ մեր մեծերը, դեռ դարեր առաջ ասել են, որ մեր ազգի փրկությունը մեր միասնության մեջ է:
Հուսով եմ իմ ձայնը տեղ կհասնի:
Դուք պարտավոր եք լինել ժողովրդի հետ:
Ես շատ եմ սիրում մեր երկիրը և մտահոգված եմ նրա վաղվա օրով:
Հարգանքներով` Գ. Իսրայելյան: