Այսօրվա ասուլիսին Հայաստանի արհմիությունների կոնֆեդերացիայի փոխնախագահ Բորիս Խառատյանը հայտնել է, որ միության անդամներն իրենց հիմնականում դիմում են վնասի հատուցման, աշխատանքային պայմանագրի, արձակուրդի հետ կապված հարցերով: Աշխատողի իրավունքների խախտման դեպքում կոնֆեդերացիան դիմում է գործատուին: Եթե վերջինը ոչինչ չի ձեռնարկում իրավիճակը շտկելու համար, գործը հասնում է դատարան: Խոսելով կուտակային համակարգի մասին` Բ. Խառատյանն ասել է. «Մենք դեռ 2010 թվականից են բարձրաձայնում, որ նման համակարգի կիրառումը ժամանակավրեպ է: Մեզ մոտ միջին աշխատավարձը 150-160 հազար դրամ է կազմում, իսկ պարտադիր կուտակային համակարգը կարող է արդյունավետ գործել, եթե աշխատողն ունի ավել գումար, կարող է բավարարել իր ու ընտանիքի պահանջները, իսկ ավելացված գումարը կուտակել»,- ասաց նա:
Պատասխանելով հարցին, թե երբևէ բարձրաձայնել եք Հայաստանի նվազագույն աշխատավարձի սպառողական զամբյուղին անհամապատասխան լինելու մասին, Բ. Խառատյանը հայտնել է. «Հայաստանում գոյություն չունի պաշտոնապես սահմանված սպառողական զամբյուղ: Հաշվարկում են տարբեր մեթոդաբանություններում, և ստացվում են տարբեր թվեր: 45 հազար դրամ գործող նվազագույն աշխատավարձն իր մեջ ոչ մի հաշվարկ չի պարունակում, ինչը ստեղծում է անկանխատեսելիություն»:

7or.am