Հայաստանի գործատուների միության նախագահ Գագիկ Մակարյանն այսօրվա ասուլիսին շեշտել է, որ Հայաստանի քաղաքացին առաջնորդվում է խիստ ներկայով, քանի որ ստացած եկամտով հնարավոր չէ ապագայի պլաններ կազմել: Ըստ բանախոսի` Հայաստանի այսօրվա շուկան չունի այն շունչը, որը կար խորհրդային տարիներին:

«Արդյունաբերական ձեռնարկություններում աշխատողների թվաքանակը փոքր է՝ մոտ 400 հազար զբաղվածներ մասնավոր և պետական սեկտորում։ Եվ ստացվում է, որ զբաղվածության տեսանկյունից զգալի մասը բաժին է ընկնում փոքր բիզնեսին, մինչդեռ շատերի մոտ այն տեսակետն է, որ խոշորներն են ապահովում»,- ասել է Գ. Մակարյանը` ավելացնելով, որ Հայաստանում գործազրկության ցուցանիշն իրականում ավելի բարձր է: Մարդիկ եթե կանոնավոր չեն աշխատում, դա չի նշանակում, որ նրանք լիարժեք զբաղված են:

Անդրադառնալով կուտակային կենսաթոշակի վիճահարույց խնդրին` Գործատուների միության նախագահն ընդգծել է, որ գործատուների վերաբերմունքը կուտակայինին բավական բացասական է: Գ. Մակարյանը շեշտել է, որ նոր Կառավարությունն առաջին հերթին պետք է այն խնդիրներով զբաղվի, որոնցով այսօր մտահոգված է հասարակությունը:

7or.am