ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱԶԳԱՅԻՆ ԺՈՂՈՎԻ ՆԱԽԱԳԱՀ

պարոն ԳԱԼՈՒՍՏ ՍԱՀԱԿՅԱՆԻՆ

Հարգելի պարոն Սահակյան

Ձեզ ենք ներկայացնում Հայաստանի Հանրապետության կառավարության եզրա­կա­ցու­­­­թյունը Հայաստանի Հանրապետության Ազգային ժողովի պատգամավորներ Հակոբ Հակոբյանի, Ռուբեն Հովսեփյանի, Վրեժ Մարկոսյանի և Արմեն Մխիթարյանի՝ օրենս­դրական նախաձեռնության կար­գով ներկայացրած «Պե­տա­կան կենսաթոշակների մա­սին» Հայաստանի Հանրապե­տու­թյան օրեն­քում փոփոխություններ և լրացում կա­տարելու մասին» Հա­յաս­­տանի Հանրա­պե­տու­թյան օրենքի նախագծի (Պ-489-08.04.2014-ՍՀ-010/0) վերաբերյալ:

Նախագծով, ըստ էության առաջարկվում է.

1) չվճարված կենսաթոշակի գումարը վճարել անցած ամբողջ ժամանակահատվածի հա­մար, առանց ժամկետային սահմանափակման,

2) Հայաստանի Հանրապետությունում չգտնվող կենսաթոշակառուի կենսաթոշակը վճա­րել առանց սահմանափակումների (լիազորագրի հիման վրա կամ բանկային հաշվին փոխանցելու միջոցով):

Ներկայացվող նախագիծն ընդունվելու դեպքում էապես կավելանան կենսաթո­շակ­նե­րի վճարմանն ուղղվող ծախսերը և համաձայն նախնական հաշվարկների, կենսաթոշակների վճարումը ֆինանսավորելու համար առաջիկա 2-3 տարիներին կպահանջվի միանվագ շուրջ 25 մլրդ դրամ, իսկ անհրաժեշտ լրացուցիչ միջոցները միջնաժամկետ ապագայում կկազմեն տարեկան շուրջ 10-15 մլրդ դրամ:

Նշված ֆինանսական միջոցները նախատեսված չեն Հայաստանի Հանրապետության 2014 թվականի պետական բյուջեով և Հայաստանի Հանրապետության պետական միջնաժամկետ ծախսային ծրագրերի մշակման մշտապես գործող բարձրագույն խորհրդի 2014 թվականի ապրիլի 2-ի N 23.6/191439-14 որոշմամբ հաստատված Հայաստանի Հան­րա­պե­տության 2015-2017թթ. պետական բյուջեներից իրականացվելիք բյուջետային ծախսերի ֆի­նանսավորման 2015-2016թթ. ճշգրտված և 2017 թվականի կողմնորոշիչ չափաքանակ­նե­րով:

Սա նշանակում է, որ պետք է վերանայել կենսաթոշակների չափերի բարձրացման քա­ղաքականությունը և կենսաթոշակային ապահովության ոլորտում վարվող քաղաքականու­թյան թիրախային ցուցանիշները:

Խնդրո առարկա է նաև առաջարկվող փոփոխությունների հիմնավորումները: Մասնավորապես, համաձայն նախագծին կից ներկայացված տեղեկանքի, առաջարկվող փոփոխությունների ընդունումը հիմնավորվում է 2013 թվականի հունվարի 1-ից գործող «Եկամտային հարկի և պարտադիր կուտակային վճարի անձնավորված հաշվառման մասին» Հայաստանի Հանրապետության օրենքով, մինչդեռ այն որևէ կերպ չի առնչվում ներկայաց­ված օրենքի նախագծի կարգավորման առարկային:

Օրենքի նախագծում օրենսդրական տեխնիկայի կանոնները մասամբ պահպանված չեն:

Ելնելով շարադրվածից, Հա­յաս­տանի Հանրապետության կառա­վա­րու­թյունը դեմ է ներկայացված օրենքի նախագծի ընդունմանը:

Ներկայացված նախագիծը Հայաս­տա­նի Հան­րա­պետության Սահմա­նադրու­թյան 75-րդ հոդվածի հա­մաձայն պետք է ընդունվի պատ­­գա­մա­վոր­ների ընդհանուր թվի ձայների մեծամասնու­թյամբ:

Միաժամանակ հայտնում ենք, որ, ներկայացված օրենքի նախագիծը Հայաս­տա­նի Հան­րա­պետության Ազգային ժողովում քննարկելիս, հարակից զեկուցմամբ հան­դես կգա Հա­յաս­տա­նի Հանրապետության աշխատանքի և սոցիալական հարցերի նա­խա­­րարի պաշտոնակատար Արտեմ Ասատրյանը:

Նախագծի ընդունման դեպքում Հայաստանի Հանրապետության կառա­վա­րու­թյան 2011 թվականի մայիսի 5-ի «Պետական կենuաթոշակների մաuին» Հայաuտանի Հան­րա­պետության oրենքի կիրարկումն ապահովելու մասին» N 665-Ն որոշման մեջ եռամսյա ժամ­կետում կկատարվեն համապատասխան փոփոխություններ:

Կից ներ­կա­յաց­վում են օրենքի նախագծի կարգավոր­ման ազ­դե­ցու­­թյան գնա­հատ­ման եզ­րակացությունները:

Հարգանքով` ՀՈՎԻԿ ԱԲՐԱՀԱՄՅԱՆ