ՀՀ ՎԱՐՉԱՊԵՏ ՀՈՎԻԿ ԱԲՐԱՀԱՄՅԱՆԻՆ

Պ Ա Հ Ա Ն Ջ Ա Գ Ի Ր

Եվրոպայի Հայկական Միությունների Ֆորումի Նախագահությունը` իր հանձնախմբերով հանդերձ, ուշի-ուշով հետևելով Ձեր գործունեությանը, հանգել է այն եզրակացության, որ վարչապետության մեկամսյա գործունեությունը առայժմս ընթանում է ոչ ցանկալի ուղղությամբ, և դեռ տեսանելի չեն աշխարհասփյուռ հայության շահերից բխող հստակ գործառույթներ:

Նման եզրահանգման համար հիմք են հանդիսանում ՀՀ կառավարության կողմից.

-«կուտակային» օրենքի ընդունման առումով հանրության համար դեռևս ըկալելի չեն ՀՀ քաղաքացիների շահերին միտված քայլերը,

-«շքեղության հարկի» վերացումը, որը պետք է ծառայեր սոցիալական արդարության հաստատմանը,

-խոշոր հարկատու հանդիսացող ձեռնարկությունների համար պարտադիր աուդիտը վերացնելու օրենսդրական նախաձեռնությունը, որը իր մեջ ստվերային տնտեսությունը վերահսկելու անհնարինության ռիսկեր է պարունակում,

- հարկատուներին և ողջ հանրությանը պետական բարձր պաշտոններ զբաղեցնող անձանց արարողակարգային ծախսերի բաց տեղեկատվությունից զրկելը:

Տպավորությունը այնպիսին է, որ ՀՀ կառավարությունը առայժմ կատարում է բացահայտ քայլեր, որոնք բխում են պետական պաշտոնյաների և օլիգարխիայի շահերից: Այս ամենին եթե ավելացնենք Ձեր նախաձեռնությամբ իրականացված հայաստանյան գործարարների հավաքին հնչած մտքերը, որտեղ գործարարներին մեկ ամիս ժամանակ է տրվել «նոր» կանոններով աշխատելու համար, ապա ստիպված ենք արձանագրել, որ ցավոք ՀՀ կառավության անդամների մոտ բացակայում է ազգային անվտանգությանը սպառնացող համատարած ճգնաժամի գոյության գիտակցումը, քանի որ նոր կառավարությունը զբաղված է ոչ հրատապ` մակերեսային խնդիրների լուծումներով:

Երկիրը շարունակվում է ղեկավարվել առավելաբար տղայական մոտեցումներով, այնինչ այս պահին շատ կարևոր է հասկանալ աշխարհում և մասնավորապես մեր տարածաշրջանում ընթացող ռազմաքաղաքական գործընթացների ուղղությունները և գիտակցել, որ Հայաստանի Հանրապետությունը 3 ճակատով /Ադրբեջան, Նախիջևան, Թուրքիա/ փաստացի գտնվում է պատերազմի մեջ, հետևաբար կատարել տնտեսության հզորացման քայլեր, որոնք կամրապնդեն մեր ռազմական հաղթանակները:

ԵՀՄՖ Նախագահությունը լիահույս է, որ ՀՀ ԱԺ-ին մոտ ապագայում ներկայացվող ՀՀ կառավարության ծրագիրը իր մեջ կներառի Հայաստանի և Արցախի տնտեսությունը արագացված քայլերով վերականգնելու և առավել զարգացնելու ուղղությամբ նախատեսված ծրագրեր, սակայն գոյություն ունի մեկ պարտադիր քայլ, որի բացակայության պարագայում հետագա բոլոր արդյունքները կզրոյանան, այդ կապակցությամբ ԵՀՄՖ Նախագահությունը ՀՀ Վարչապետից

Պ Ա Հ Ա Ն Ջ ՈՒ Մ Է

Օգտվելով ՀՀ Վարչապետին տրված ՀՀ Քրեական Օրենսգրքի հնարավորություններից` շտապ ձեռնարկել քայլեր մամուլում բազմակի անգամ հրապարակված, ինչպես նաև ԱԺ Վերահսկիչ Պալատի կողմից ուսումնասիրված և հաստատված ՀՀ բարձրագույն պաշտոններ զբաղեցրած Տիգրան Սարգսյանի և նրա մերձավորների կողմից կատարված հարյուրավոր միլոնների հասնող գանձագողության, օֆշորային ֆինանսական աճպարարությունների, բյուջետային միջոցների կանխամտածված և միաժամանակ իրենց համար եկամտաբեր «վատնումների»` պետության համար վնասարարության փաստերի առթիվ հետաքննությունների իրականացում` ՀՀ դատախազության, ոստիկանության, Ազգային անվտանգության ծառայության կողմից:

Համաձայն ՀՀ Քրեական օրենսգրքի դրույթների` հանցագործությունը կոծկելը նույնպես համարվում է հանցագործություն, հետևաբար, լիահույս ենք, որ ՀՀ ներկայիս կառավարությունը զերծ կմնա կատարված հանցագործությունների աղաղակող փաստերը չնկատել տալու քաղաքականությունից և կկատարի ՀՀ Սահմանադրությունով իրեն վերապահված պարտադիր գործողություներ:

Միայն նման գործելոճ որդեգրելու արդյունքում է հնարավոր վերականգնել ժողովրդի վստահությունը հայրենի կառավարության հանդեպ, կասեցնել արտագաղթը և դեռ խթանել ներգաղթը, իսկ սփյուռքյան և արտասահմանյան ներդրողների համար որպես նախապայման: Հետևաբար այն գիտակցելու ու գործի դնելու պարագայում Եվրոպայի Հայկական Միությունների Ֆորումի նախագահությունը պատրաստ է իր «համեստ» աջակցությունը տրամադրել իրավապահներին, ինչպես նաև ակտիվ մասնակցություն ունենալ դեպի Հայաստան խոշոր ֆինանսական ներդրումների հոսք ապահովելու գործում:

ԵՀՄՖ Նախագահություն