Associated Press-ի փոխանցմամբ՝ Միացյալ Նահանգների Լոգան քաղաքում ԱՄՆ ազգային գվարդիայի զինվորը երկու մարդ է սպանել, այնուհետև ինքնասպան եղել:

Ըստ ոստիկանության տվյալների՝ 23-ամյա Ջարեդ Թոլմանը գիշերը ներխուժել է բնակարան և հրազենից արձակված կրակոցներով սպանել 19-ամյա աղջկա և 25-ամյա տղամարդու: Այնուհետև նա ուղղվել է դեպի մեկ այլ տուն՝ որոնելով ինչ–որ տղամարդու։ Չգտնելով նրան՝ Թոլմանը ինքնասպան է եղել:

Սպանությունից առաջ Թոլմանը բջջային հեռախոսից մի քանի կարճ հաղորդագրություններ է ուղարկել աղջկան, սակայն դրանց բովանդակությունն անհայտ է: Ինքնասպան լինելուց առաջ նա նաև գրություն է թողել ծնողներին: