Լիսաբոնում կայացած ՆԱՏՕ-ի գագաթաժողովի եզրափակիչ հռչակագրի  35-րդ կետում  գագաթաժողովը  նշեց, որ ՆԱՏՕ-ն աջակցում է   Հայաստանի, Ադրբեջանի, Վրաստանի եւ Մոլդովայի Հանրապետությունների  տարածքային ամբողջականությանը, անկախությանը եւ ինքնավարությանը,  եւ, որ դաշինքը շարունակելու է  աջակցել այս տարածաշրջաններում հակամարտությունների խաղաղ կարգավորմանը' առաջնորդվելով  վերոնշյալ  սկզբունքներով:

Այս դրույթի հետ կապված Հայաստանի Հանրային Ռադիոընկերության  «Ռադիոլուր» լրատվական ծրագիրը պաշտոնական պարզաբանում է  խնդրել  Հայաստանում Ամերիկայի Միացյալ Նահանգների  ու  Ֆրանսիայի դեսպանատներից'  ԵԱՀԿ Մինսկի խմբի համանախագահ, միաժամանակ նաև ՆԱՏՕ-ի անդամ երկրներ ԱՄՆ-ի  ու Ֆրանսիայի դիրքորոշման վերաբերյալ' ԼՂ  հակամարտության կարգավորման հետ կապված: Ռադիոլուրի հարցման մեջ մասնավորապես նշվել է.

«Ղարաբաղի հակամարտության կարգավորման վերաբերյալ  եռանախագահող երկրերն ի դեմս իրենց նախագահների,  բազմիցս հայտարարել են կարգավորման գործընթացի առնչությամբ իրենց դիրքորոշման մասին. այն է'  հակամարտությունը պետք է կարգավորվի ուժի կամ դրա սպառնալիքի չկիրառման, տարածքային ամբողջականության եվ ազգերի ինքնորոշման  սկզբունքներով: Մինչդեռ ՆԱՏՕ-ի լիսաբոնյան հռչակագրում ներառվեց դրույթ, որտեղ  հարավկովկասյան հակամարտությունների վերաբերյալ   նախկին  ընդհանրացված ձևակերպումը պահպանվեց: Ընդ որում այդ ձևակերպումը  չի համադրվում  եռանախագահող երկրների նախագահների' ԼՂ հակամարտության կարգավորման գործընթացի վերաբերյալ   մինչ այդ արած հայտարարությունների հետ»:

Հայաստանում Ամերիկայի Միացյալ Նահանգների դեսպանությունը «Ռադիոլուրի» հարցմանը պաշտոնապես պատասխանել է. 

«Միացյալ Նահանգները շարունակում է հավատարիմ մնալ հակամարտության խաղաղ և տևական լուծմանը Մինսկի խմբի գործընթացի միջոցով' Հելսինկյան  եզրափակիչ փաստաթղթում ամրագրված' ուժի կամ դրա սպառնալիքի չկիրառման, տարածքային ամբողջականության և ազգերի ինքնորոշման սկզբունքների, ինչպես նաև նախագահներ Օբամայի, Սարկոզիի և Մեդվեդևի  կողմից 2009թ. Լ'Աքվիլայում և 2010թ. Մուսկոկայում արված  համատեղ հայտարարություններով վերահաստատված տարրերի հիման վրա»: 

Հայաստանում Ֆրանսիայի դեսպանության պաշտոնական պատասխանը' «Ռադիոլուրին».

«Ֆրանսիան, որպես ԵԱՀԿ Մինսկի խմբի համանախագահող երկիր, շարունակում է հավատարիմ մնալ Լեռնային Ղարաբաղի հակամարտության բանակցված կարգավորմանը' հիմնված Հելսինկյան եզրափակիչ ակտի սկզբունքների ' ուժի կամ դրա սպառնալիքի չկիրառման, տարածքային ամբողջականության եվ ազգերի ինքնորոշման սկզբուքնների , ինչպես նաեվ նախագահներ Սարկոզիի, Մեդվեդեվի եվ Օբամայի կողմից Լ'Աքվիլայում  եվ Մուսկոկայում արված համատեղ հայտարարություններում ներառված տարրերի վրա»: