Ինչպես արդեն տեղեկացրել էինք, թրքական «Aksiyon» հրատարակությանը տված հարցազրույցում Եվրախորհրդի խորհրդարանական վեհաժողովի նախագահ Մովլութ Չավուշօղլուն ասել էր, թե իրենք ԵԽԽՎ-ում Լեռնային Ղարաբաղի հակամարտության հարցով ենթահանձնաժողով կստեղծեն։

«7օր»-ի հետ զրույցում ԲՀԿ պատգամավոր, ԱԺ Եվրաինտեգրման հարցերով հանձնաժողովի նախագահ Նաիրա Զոհրաբյանը անդրադառնալով այս հայտարարությանը՝ ասել է.

-Չավուշօղլուն հղում է անում ԵԽԽՎ-ի 1416 բանաձևին, որտեղ հատուկ առաջարկ է արված ԼՂ հարցով ենթահանձնաժողով ստեղծելու մասին։ Բնականաբար հասկանալի է, որ հիմա, երբ նոյեմբերի 10-ից մինչև մայիսի 15-ը ԵԽԽՎ-ի Նախարարների կոմիտեի նախագահությունն անցնում է Թուրքիային, և այստեղ էլ՝ ԵԽԽՎ-ում, ունենալով թուրք նախագահ՝ Թուրքիայի և Ադրբեջանի համար սա լավագույն՝ ոսկի 6-ամսյակ է իրենց շահերի օրակարգում գտնվող հարցերն արծարծելու համար։ Չավուշօղլուն կարող է նման հայտարարություն անել, բայց մեկ բան հստակ է՝ որ ո՛չ Չավուշօղլուին, ո՛չ էլ ԵԽԽՎ-ի Նախարարների կոմիտեի նախագահ Դավութօղլուին չի հաջողվելու առաջ մղել իրենց օրակարգում ու շահերի տիրույթում գտնվող հարցերը։

Ըստ Նաիրա Զոհրաբյանի՝ հայկական կողմի համար բացարձակապես անընդունելի է ԵԱՀԿ Մինսկի խմբի ձևաչափից ԼՂ խնդիրն այլ ձևաչափ տեղափոխելը։

-ՀՀ պատվիրակությունն իր զինանոցում ունի այնպիսի ծրագրերը՝ հստակ հակաքայլեր, որ եթե նույնիսկ Չավուշօղլուին հաջողվի հունվարյան նստաշրջանում Բյուրոյում այդ ենթահանձնաժողովը վերակենդանացնել, մենք կկարողանանք այդ ենթահանձնաժողովի  աշխատանքներին ընթացք չտալ և թույլ չտալ, որ աշխատի։ Ես հիմա չեմ ուզում մանրամասնել, թե դրանք ինչ հակաքայլեր են, բայց մի բան հաստատ կարող եմ ասել՝ որ այդ ենթահանձնաժողովը չի աշխատելու,-նշել  է նա։

7or.am