«Բարգավաճ Հայաստան» կուսակցության քաղաքական խորհրդի և անձամբ իմ անունից խոր մտահոգություն եմ հայտնում Իրաքի հյուսիսային շրջաններում տեղի ունեցող իրադարձությունների կապակցությամբ, որը միջազգային հանրությունն արդեն իսկ որակել է որպես եզդիների ցեղասպանություն:

Խորապես դատապարտում ենք իսլամիստ ծայրահեղականների հետապնդումների արդյունքում տասնյակ հազարավոր եզդիների հանդեպ նման գործելաոճը և ևս մեկ անգամ վերահաստատում, որ անհրաժեշտ է ամենասեղմ ժամկետներում գործնական քայլեր ձեռնարկել Իրաքում եզդիների ցեղասպանությունը կանխելու ուղղությամբ:

Մեր երկիրը պարտավոր է բարձրաձայնել Իրաքում և, ընդհանրապես, ամբողջ աշխարհում կրոնական և ազգային փոքրամասնությունների նկատմամբ իրականացվող բռնություններին վերջ տալու անհրաժեշտության մասին, և դրա համար հարկավոր է օգտագործել բոլոր հնարավոր լծակներն ու հարթակները:

Բարգավաճ Հայաստան կուսակցությունն իր աջակցությունն ու զորակցությունն է հայտնում ՀՀ-ում բնակվող տասնյակ հազարավոր եզդիներին և պատրաստակամություն հայտնում սատար կանգնել անհրաժեշտության դեպքում: Հարկ եղած դեպքում «Գագիկ Ծառուկյան» բարեգործական հիմնադրամը պատրաստ է անհրաժեշտ հումանիտար նպատակային օգնություն տրամադրել դրա կարիքն ունեցող բարեկամ եզդի ժողովրդին:

Ցեղասպանություն վերապրած հայ ժողովուրդն ու մեր պետությունը պարտավոր են օգնության ձեռք մեկնել եղբայրական եզդի ժողովրդին:

ԲՀԿ նախագահ Գագիկ Ծառուկյան