Ընդդիմադիր «Ժառանգություն» և Հայ ազգային կոնգրես խմբակցությունները կաջակցեն քառյակի իրենց գործընկերներին Սահմանադրական դատարան դիմելու հարցում: Այս մասին «Ազատությանը» տեղեկացրին այդ խմբակցությունների ղեկավարները՝ Ռուբիկ Հակոբյանը և Լևոն Զուրաբյանը՝ չհամաձայնելով քառյակում առկա հակասությունների և քառյակի փլուզման մասին կարծիքներին։

Քառյակը երկյակ դառնալու մասին կարծիքներ հնչեցին օգոստոսի 27-ին Ազգային ժողովում «Բարգավաճ Հայաստան»-ի և Դաշնակցության երկկողմ փակ հանդիպումից հետո, որի ընթացքում քննարկվել էր կուտակային կենսաթոշակային համակարգի մասին նոր օրենքը ՍԴ-ում վիճարկելու հարցը:

«Ժառանգությունն» ու Կոնգրեսը դեմ են դատարան դիմելուն, բայց դիրքորոշումների տարբերություններում քառյակին ուղղված որեւէ վտանգ չեն տեսնում:

«Ես հասկանում եմ, որ ինչ-որ շատ մեծ ցանկություն կա, որ անպայման հակասություններ տեսնեն քառյակում, ամեն մի առիթն արհեստականորեն օգտագործում են, ուռճացնում են, որպեսզի հակասություններ գտնեն, բայց ի սկզբանե ասել ենք, որ քառյակը այն հարցերի շուրջ է միասին դիրքորոշում ունենում, եթե բոլորը համաձայն են, ունեն նույն մոտեցումը, իսկ եթե չունեն նույն մոտեցումը, ցանկացած խմբակցություն կարող է վարվել այնպես, ինչպես ճիշտ է գտնում, բայց ամբողջությամբ թե մենք, թե ՀԱԿ-ը պատրաստակամ ենք աջակցել ստորագրությամբ և մասնակցել քննարկումներին», - ասաց Ռուբիկ Հակոբյանը՝ հավելելով, որ անհրաժեշտություն չի եղել, որպեսզի իրենք էլ հրավիրվեին ԲՀԿ-ի և Դաշնակցության խմբակցությունների միջև կայացած հանդիպմանը, քանի որ քննարկված հարցերի շուրջ արդեն իսկ արտահայտել են իրենց հստակ դիրքորոշումը, ինչպես նաև՝ դա առաջին երկկողմ հանդիպումը չէր:

Կոնգրեսի խորհրդարանական խմբակցության ղեկավար Լևոն Զուրաբյանը Սահմանադրական դատարան դիմելու հարցում իրենց անհամաձայնությունը բացատրեց նրանով, որ այդ կառույցը դիտարկում են որպես «ռեժիմի արարքները լեգիտիմացնող գործիք»: Նույն կուտակայինի վերաբերյալ այս դատարանի վերջին որոշումն էլ, ըստ Զուրաբյանի, դրա վկայությունն էր:

«Նա հուշեց կառավարությանը, իշխանություններին այն ուղիները, թե ինչպես կարելի է օրենքի էությունը չփոխելով՝ ապահովել դրա համապատասխանությունը սահմանադրականությանը: Նման Սահմանադրական դատարանին դիմելը մենք համարում ենք անիմաստ գործ: Էս ռեֆորմից կարելի է ստիպել հրաժարվել այս իշխանություններին միայն համաժողովրդական ճնշման ներքո, բայց մյուս կողմից, մենք հարգում ենք մեր գործընկերներին, եթե նրանք կարծում են, որ ՍԴ-ում այդ հարցի արծարծումը ինչ-ինչ օգուտ կարող է բերել, բնականաբար եթե լինի մեր ստորագրությունների կարիքը, մենք պատրաստ ենք մեր ստորագրությունները տրամադրել», - «Ազատության» հետ զրույցում ասաց Զուրաբյանը:

Մանրամասները՝ azatutyun.am–ում։