ՀՀ կառավարության այսօրվա նիստին վարչապետ Հովիկ Աբրահամյանի առաջարկով Կենտրոնական բանկի նախագահի տեղակալ Ներսես Երիցյանը պարազաբանումներ է ներկայացրել դրամի արժեզրկման և գնաճի վերաբերյալ։ Երիցյանը կրկնեց այն, ինչ ասված էր ԿԲ տարածած հայատարարության մեջ։ Այն է՝ վերջին շրջանում միջազգային շուկաներում և տարածաշրջանում տեղի ունեցած զարգացումները, այդ թվում` արժութային շուկայի մեծ տատանումները նպաստել են ներքին արժութային շուկայում դրամի արժեզրկմանը և ձևավորված որոշակի սպասումների ներքո՝ հանգեցրել նաև փոխարժեքի տատանողականության աճին։

«Ցավոք, ձևավորված սպասումներն այսօր հեռու են մեր տնտեսության հիմնարարներից, և որոշակի մտավախությունների տեղիք են տվել, քանի որ նաև ճշգրտվում է փոխարժեքը»,–ասել է ԿԲ փոխնախագահը։

Նա նշել է, թե ԿԲ–ն ամենայն պատասխանատվությամբ է մոտենում իր գործառույթներին, որպեսզի կայունացնի շուկայում իրավիճակը։

«Գործի ենք դրել մեր տրամադրության տակ գտնվող բոլոր հնարավոր միջոցները և գործիքները, այդ թվում՝ շուկայում իրացվելիության, լոմբարդային գործիքների միջոցով, և արժութային շուկայում տարբեր միջամտություներ անելու, որպեսզի կարողանանք տատանողականությունը հաղթահարենք: Բայց այն, ինչը դրսի շուկայով է պայմանավորված, այդ ճշգրտումները, բնականաբար, պետք է իրենց տեղը գտնեն»,–նշել է Երիցյանը՝ հավաստիացնելով, թե ԿԲ պահուստները լիովին բավարար են՝ կանխելու փոխարժեքի արհեստական տատանումները։

7or.am