Սիրիայի՝ ԻՊ կողմից վերահսկվող շրջանների մոտ 600 հազար բնակիչ չի ստանում պարենային օգնություն 2014թ. դեկտեմբերից։ Այս մասին ասել է ՄԱԿ–ի մարդասիրական հարցերով գլխավոր քարտուղարի օգնական Քյունգ–վա Քանգը ՄԱԿ–ի ԱԽ նիստում։

«Ռաքքա և Դեյր–էզ–Զոր նահանգներում ԻՊ–ն փակել է մի քանի կազմակերպությունների ներկայացուցչությունները, այդ թվում՝ սիրիական Կարմիր կիսալուսնի՝ մեր գլխավոր գործընկերոջ։ Մոտ 600 հազար մարդ այդ նահանգներում չի ստանում պարենային օգնություն դեկտեմբերից», – ասել է նա։
Գլխավոր քարտուղարի օգնականը նաև հաղորդել է, որ հունվարին ավելի քան 2 մլն բնակիչ Հալեպի և Դերաա նահանգներում զրկվել է ջրամատակարարումից և հոսանքից հակամարտության կողմերի միտումնավոր քայլերի հետևանքով։ Նա լուրջ անհանգստություն է հայտնել իրավիճակի կապակցությամբ, որում գտնվում են շրջանների բնակիչները։

«Շրջափակված 212 հազար բնակչից մեզ հաջողվել է օգնել միայն 304»-ին, – ասել է օգնականը։

Տեղեկացնում է «ՏԱՍՍ»–ը։