ԲՀԿ համագումարից հետո որոշ լրատվամիջոցներ իրականությանը չհամապատասխանող տեղեկություն են տարածել, թե, իբր, ԲՀԿ նորընտիր նախագահ Նաիրա Զոհրաբյանն ասել է, թե կուսակցությունում առաջիկայում պետք է ստեղծվի նոր ղեկավար պաշտոն՝ կուսակցության քաղխորհրդի նախագահի պաշոնը:

Ավելին, այս տեղեկությանն ինտրիգ հաղորդելու համար նշվում է, թե, իբր, այդ պաշտոնը ստեղծվելու է հատուկ Աբրահամ Մանուկյանի համար:

«Top-News.am»–ի հետ զրույցում ԲՀԿ նորընտիր նախագահ Նաիրա Զոհրաբյանը ցավով նշեց, որ որոշ լրատվամիջոցներ, կամա թե ակամա, նենգափոխում են փաստերը: Նա շեշտեց, որ ԲՀԿ կանոնադրության 8.5 կետի համաձայն՝ վաղուց արդեն գոյություն ունի ԲՀԿ քաղաքական խորհրդի նախագահի պաշտոնը, որը մինչ այժմ զբաղեցնում էր կուսակցության նախագահը:

Նաիրա Զոհրաբյանը թե՛ այսօր կայացած ճեպազրույցում, թե՛ կայքի հետ ունեցած զրույցում շեշտեց, որ կուսակցությունում հակակշիռ ստեղծելու համար ցանկանում է տարանջատել կուսակցության նախագահի եւ քաղխորհրդի նախագահի պաշտոնները: Նա ավելացրեց, որ այս որոշումը հավանության է արժանացել տեղական կառույցներում եւ հենց քաղխորհրդի կողմից:

Նաիրա Զոհրաբյանը շեշտեց, որ քաղխորհրդի նախագահի տեղակալ ընտրված Վարդան Վարդանյանին առաջարկել է առանց ավելորդ ձեւականությունների, դե ֆակտո ստանձնել քաղխորհրդի նախագահի պաշտոնը, մինչեւ հաջորդ համագումարում համապատասխան որոշում կայացվի, եւ պաշտոնը ստանձնի արդեն դե յուրե: Բանն այն է, որ ըստ գործող օրենսդրության՝ նման փոփոխություն իրականացնելու համար դեռ մեկ ամիս առաջ պետք է դիմում ներկայացվեր ՀՀ արդարադատության նախարարությանը:

Այսպիսով, ստահոդ են այն տեղեկությունները, թե ԲՀԿ-ում նոր է ստեղծվելու քաղխորհրդի նախագահի պաշտոնը, եւ, առավել եւս, իրականությանը չեն համապատասխանում այն լուրերը, թե այն հատուկ ստեղծվել է ինչ–որ մարդու համար:

Աղբյուրը՝ «Top-News.am»