Այսօր մի քանի ժամ տևած ՀՀԿ ԳՄ նիստից հետո այդ կուսակցության մամուլի խոսնակ Էդուարդ Շարմազանովը լրագրողներին ասել է, որ քննարկել են նաև ՀՀ էներգետիկ անվտանգության հարցը։

–Պետք է ասեմ, որ շատ հարգալից ենք վերաբերվում մեր քաղաքացիների խաղաղ ելույթներին և նրանց արդարացի պահանջին։ Նաև դրական ենք գնահատում ոստիկանության պրոֆեսիոնալիզմը։ Կառավարության ներկայացրած թվերն օբյեկտիվ են, բայց սա չի նշանակում, որ այլ ճանապարհներ չպետք է գտնվեն։ Հայաստանի իշխանություններն ամեն ինչ անելու են, որպեսզի մենք ունենանք հնարավորինս կայուն էներգետիկ անվտանգության համակարգ, և որի որոշումներն ավելի ընկալելի կլինեն մեր հասարակության համար։ Անցկացվելու է աուդիտ,–հայտարարել է Շարմազանովը։

Նա նաև չի ուզում՝ այնպիսի տպավորություն ստեղծվի, թե էլեկտրաէներգիայի սակագինը բարձացնելու համար յոթ դրամն «օդից է եկել»։

–Բոլոր մասնագետների հաշվարկներով՝ այդ յոթ դրամն օբյեկտիվ է։ Ցուցարարների և իշխանությունների ցանկությունը մեկն է՝ էներեգետիկ համակարգն առողջանա, և հավելյալ ծանրություն քաղաքացիների վրա չընկնի։ Պետք է քննարկենք այդ հարցը,–հավելել է Շարմազանովը։

Նա նաև նշել է, որ Բաղրամյան պողոտայում ընթացող բողոքի գործողությունում քաղաքական պայքար չի տեսնում։

–Այնտեղ քաղաքական պայքար չէ. այնտեղ պայքարը սոցիալական է։ Սա մեր քաղաքացիների՝ իրենց իրավունքների պայքարն է,–ասել է Շարմազանովը։

7or.am