ԵԱՀԿ Մինսկի խմբի համանախագահները հանդիպել են Ռուսաստանի արտգործնախարար Սերգեյ Լավրովի հետ։ Այս մասին «Instagram»–ի իր էջում հայտնել է ամերիկացի համանախագահ Ջեյմս Ուորլիքը։

Հանդիպմանը քննարկվել են Լեռնային Ղարաբաղի հակամարտության կարգավորման հարցում միջնորդության հաջորդ քայլերը։

«Բոլոր համանախագահ երկրները հավատարիմ են Լեռնային Ղարաբաղի խաղաղ և բանակցությունների միջոցով կարգավորմանը»,- գրել է Ուորլիքը։

Մինսկի խմբի համանախագահների հետ հանդիպել է նաև ԵԱՀԿ նախագահ, Սերբիայի արտաքին գործերի նախարար Իվիցա Դաչիչը։

ԵԱՀԿ կայքը հայտնում է, որ հանդիպմանը մասնակցել է նաև ԵԱՀԿ գործող նախագահի անձնական ներկայացուցիչ Անջեյ Կասպշիկը:

Համանախագահները ԵԱՀԿ նախագահին տեղեկացրել են հայ–ադրբեջանական զորքերի շփման գծում ծագած լարվածության և Հայաստանի ու Ադրբեջանի պաշտոնատար անձանց հետ տարվող բանակցային գործընթացի մասին:

Դաչիչը ցավակցություն է հայտնել զոհվածների ընտանիքներին և դատապարտել իրավիճակի սրումը` կոչ անելով կողմերին զսպվածություն ցուցաբերել և աշխատանք տանել լարվածությունը թուլացնելու ուղղությամբ:

ԵԱՀԿ նախագահն իր աջակցությունն է հայտնել ԵԱՀԿ Մինսկի խմբի աշխատանքին և ընդգծել, որ Սարգսյան–Ալիև հանդիպումը լավ քայլ կլինի բանակցային գործընթացն առաջ տանելու և վստահության ամրապնդման ուղղությամբ։

7or.am