Հրավիրված մամուլի ասուլիսում Հայ ազգային կոնգրեսի մաս կազմող ՍԴՀԿ ատենապետ Լյուդմիլա Սարգսյանը լրագրողներին հարց է տվել, թե երբ խոսում են ընտրական գործընթացների մասին, ի՞նչ նկատի ունեն՝ հերթակա՞ն, թե՞ արտահերթ ընտրություններ.

-Ես ընդհանրապես չեմ ուզում խոսել հերթական ընտրությունների մասին,-ասել է Լ. Սարգսյանը՝ պնդելով, թե լինելու են արտահերթ ընտրություններ։-Եթե երկու ամիս շուտ էլ անենք, դա հերթական չէ։

ՍԴՀԿ ատենապետն ասել է, թե արտահերթ ընտրություններն իրենց կարևորագույն խնդիրներից մեկն են. «Որովհետև պրակտիկան և մեր անկախ Հայաստանի 20-ամյա պատմությունը ցույց են տալիս, որ ընտրությունների միջոցով իշխանություն չի ձևավորվում»։

«7օր»-ի հարցին, թե 20-ամյա պատմություն ասելով՝ ինքը նկատի ունի նաև Լևոն Տեր-Պետրոսյանի իշխանություն եղած տարինե՞րը, տիկին Սարգսյանը պատասխանել է.

-Անկախությունից ի վեր ասելով՝ ես նկատի չունեի ամբողջ ժամանակաշրջանը։ Խոսենք 96թ.-ից հետո։

Լ. Սարգսյանը նշել է, թե ինքը հանդես չի գալիս որպես Լևոն Տեր-Պետրոսյանի պաշտպանը և ոչ էլ՝ նրա վարած նախկին քաղաքականության քննադատը.

-96-ի ընտրություններին ես չեմ մասնակցել և ընդհանրապես քաղաքականության մեջ չկայի։ Ինչ վերաբերում է 96-ի ընտրություններին, կա մի ընդհանուր կարծիք, որ այդ ընտրությունները ևս առանձնապես չէին փայլում իրենց թափանցիկությամբ։

7or.am