Ինչպես տեղեկացնում են ՀՀ  պետական եկամուտների կոմիտեից, օրերս ՀՀ ԿԱ ՊԵԿ մաքսանենգության դեմ պայքարի և կրկնակի մաքսային հսկողության վարչության աշխատակիցներն  օպերատիվ տեղեկատվություն են ստացել այն  մասին, թե Տավուշի մարզի Դեղձավան գյուղի մերձակայքում գտնվող սահմանապահ ուղեկալի դարպասներով՝ շրջանցելով Բագրատաշենի  մաքսակետը, Վրաստանից Հայաստան են ներկրվելու ոչխարներ:

Ձեռնարկված միջոցառումների արդյունքում Բագրատաշեն գյուղի մերձակա դաշտում հայտնաբերվել է 49 գլուխ ոչխար: Պարզվել է, որ ոչխարները Վրաստանում ձեռք է բերել մեր երկրի քաղաքացի ոմն Խաժակ՝ Հայաստան ներմուծելու նպատակով:

Նրա խոսքերով՝ ինքն անհրաժեշտ փաստաթղթեր ձեռք բերելու ժամանակ չի ունեցել, այդ պատճառով էլ ընտրել է ոչխարներ ներմուծելու մաքսանենգ ճանապարհը' որոշումն իրականացնելու համար դիմելով իր ծանոթ՝ ոմն Արմեն Անտոնյանի օգնությանը: Պարզվել է նաև, որ վերջինս Տավուշի մարզի Բագրատաշեն գյուղի բնակիչ է ու նա էլ իր հերթին «վարձել է» համագյուղացիներ Արթուր Ենոքյանին և Սեդրակ Մինասյանին, ովքեր և կազմակերպել են ոչխարների տեղափոխումը:

Դեպքին մասնակից բոլոր անձինք տվել են խոստովանական ցուցմունքներ:

Փաստի առթիվ կազմվել է մաքսային կանոնների խախտման վերաբերյալ արձանագրություն, իսկ 49 գլուխ ոչխարներն' առգրավվել են:

7or.am