ԵԽԽՎ–ի հունվարյան նստաշրջանում տեղի է ունեցել հակահայկական 2 բանաձևերի քննարկումը։ Նախ ելույթ է ունեցել «Ադրբեջանի սահմանամերձ բնակավայրերը միտումնավոր զրկված են ջրից» Սարսանգի ջրամբարի վերաբերյալ զեկույցի հեղինակ, Բոսնիա Հերցեգովինայի պատգամավոր Միլիցա Մարկովիչը։

Մյուս զեկույցի՝ «Բռնության աճը Լեռնային Ղարաբաղում և Ադրբեջանի մյուս օկուպացված տարածքներում», հեղինակը Ռոբերտ Ուոլթերն էր։

Ելույթի համար բազմաթիվ պատգամավորներ էին հերթագրվել: Նրանցից ոմանք հայտարարել են, որ ԼՂ հակամարտության կարգավորման բանակցային մանդատը ԵԱՀԿ Մինսկի խմբինն է, և հայտարարություններում պետք է զգուշավոր լինել:

Քվեարկության է դրվել նախագիծը լրամշակելու համար այն հետ ուղարկելը հանձնաժողով, սակայն քվեարկության արդյունքում հարցը չի ընդունվել, և քննարկումը շարունակվել է։

Այնուհետև ԵԽԽՎ–ն մերժել է Ուոլթերի զեկույցը, իսկ Մարկովիչինը՝ ընդունել։

Ուոլթերի զեկույցին կողմ է քվեարկել 66, դեմ՝ 70, ձեռնպահ՝ 45 պատգամավոր։ Մարկովիչի հեղինակած զեկույցին կողմ է եղել 98–ը, դեմ՝ 71–ը, ձեռնպահ՝ 40–ը։

Հիշեցնենք, որ ԵԱՀԿ Մինսկի խմբի համանախագահները կոչ էին արել ԵԽԽՎ–ին չձեռնարկել այնպիսի քայլեր, որոնք կբարդացնեն ԼՂ հակամարտության խաղաղ կարգավորման շուրջ բանակցային գործընթացը։

7or.am