Դմիտրի Ատբաշյան. «Ստեփանակերտի օդանավակայանի տեխնիկական անվտանգությունն ամենաբարձրն է լինելու։ Մենք օգտագործելու ենք CRJ-200 ինքնաթիռները. դրանք իրենց դրսևորել են որպես ապահով ինքնաթիռներ։ Oդային տարածքում մեր հարևանները՝ Հայաստանն ու Ադրբեջանը, քաղաքացիական ավիացիային ապօրինի ցանկացած միջամտություն կանխելու մասին միջազգային կոնվենցիա են ստորագրել և պարտավորվել են քաղաքացիական ինքնաթիռների նկատմամբ ոչ մի դեպքում չկիրառել որևէ ապօրինի գործողություն...»։

Երեկ Վրաստանի նախագահ Միխայիլ Սահակաշվիլին ժամանել է Ջավախք և մասնակցել Թբիլիսի-Ծալկա-Նինոծմինդա-Ախալքալաք նոր միջպետական մայրուղու բացմանը: 203 կիլոմետր երկարություն ունեցող այս ճանապարհը Վրաստանի կենտրոնական շրջանները կապում է Հայաստանի և Թուրքիայի հետ: Նորաբաց ճանապարհի շնորհիվ նախկին 8 ժամի փոխարեն այժմ Թբիլիսիից Ջավախք հնարավոր է հասնել ընդամենը 2,5 ժամում։ «Բարև ձեզ, եղբայրնե՛ր և քույրե՛ր: Շնորհավորում եմ ձեզ մեր պայմանավորվածությունների, ձեր երազանքի կատարման առթիվ»,–ասել է Սահակաշվիլին։