Լրահոս

27.11.2009 15:38


Արամ Սարգսյան. «Ես տարօրինակ բան չեմ տեսնում, որ վարչապետն ու իր թիմակիցներն ընդգրկվեցին ՀՀԿ շարքերը»

Արամ Սարգսյան. «Ես տարօրինակ բան չեմ տեսնում, որ վարչապետն ու իր թիմակիցներն ընդգրկվեցին ՀՀԿ շարքերը»

Մամուլի ազգային ակումբում մեկնաբանելով ՀՀԿ-ԲՀԿ խմորումները և վարչապետի ու նախարարների՝ ՀՀԿ-ին անդամագրվելը՝ ՀԴԿ նախագահ Արամ Սարգսյանն ասել է, որ մի բան է գաղափարախոսության վրա ձևավորված կուսակցությունը, այլ բան է իշխանական ռեսուրսի օգտագործման կամ փողի հնարավորություններն օգտագործելու դեպքում ստեղծված կուսակցությունը. «Կարծում եմ, որ այդ տիպի կուսակցություններն անպայման ունենալու են իրենց ներքին հակասությունները, որովհետև քաղաքականության մեջ մի սկզբունք կա՝ իշխանությունը չի կիսվում։ Անզեն աչքով երևում է, որ ոմանք արդեն սկսել են նախագահական և խորհրդարանական նախընտրական կամպանիաներ, և այդ ակտիվությունը դա է վկայում, մյուս կողմից պարզ է, որ քաղաքական թիմն իրենց պատկերացմամբ պետք է լինի միասնական, և ես տարօրինակ բան չեմ տեսնում, որ վարչապետն ու իր թիմակիցներն ընդգրկվեցին ՀՀԿ շարքերը։ Ինքնին հասկանալի է, որ այս պարագայում իրոք այդպես պետք է լիներ»։

Ա. Սարգսյանը նաև նշել է, որ կառավարությունը կանգնած է երկընտրանքի առջև, և եթե նա փորձելու է երկրում իրական փոփոխություններ կատարել, ապա օլիգարխիայի դեմ պետք է լուրջ գործողություններ իրականացնի։

-Եթե ՀՀԿ համագումարն իրոք ցանկանա ճիշտ վերլուծել այն, ինչ այսօր կատարվում է երկրում, բացահայտ ասի բոլոր պատճառների մասին և որոշում կայացնի, որ արդեն իրոք գործողություններ են պետք, ոչ թե խոսքեր, և եթե այդ գործողություններն իսկապես լինեն, ապա կարելի է սպասել որոշակի փոփոխությունների։ Ի դեպ, այդ ներքին իրավիճակի կայունությունից են ամբողջապես կախված լինելու մեր արտաքին քաղաքական հաջողությունները,- ընդգծել է նա։

Ինչ վերաբերում է ՀԴԿ հետագա գործողություններին, Ա.Սարգսյանը տեղեկացրել է, որ հավանաբար դեկտեմբերի 1-ին տեղի կունենա կուսակցությունների (ՀՅԴ, «Ժառանգություն», ՆԺԿ, ՀԴԿ և այլն) կողմից հրավիրված հավաք, որտեղ կքննարկվի հայտարարության բովանդակությունը, և հանրությանը կներկայացվի գործողությունների ծրագիրը։

7or.am

Այս խորագրի վերջին նյութերը