Այսօր Գյումրիում բացվել է բիզնես պորտալ ինտերնետային կայքէջ, որը հեղինակների կարծիքով կհետաքրքրի գործարար աշխարհին: Այն գործարարների համագործակցության ցանց է լինելու, և  փոքր ու միջին ձեռնարկատիրության զարգացման ազգային կենտրոնի Շիրակի մասնաճյուղի պատասխանատուների հավաստմամբ՝ կայքէջի միջոցով  գործարարները հնարավորություն կստանան  հեշտությամբ  հաղթահարելու տնտեսական ճգնաժամը:

Միջոցառման ժամանակ ոլորտի մասնագետները  կարծիք են հայտնել, թե  բիզնեսի խթանման  և ճգնաժամը հաղթահարելու համար սա ավելի կարևոր քայլ է, քան թեկուզ վարկային օժանդակությունը բիզնեսին:

«Այսօր ֆինանսների պակաս չկա և երբևիցե չի եղել: Մեր կազմակերպության կողմից լայնամասշտաբ վարկավորման ծրագիր է իրականացվել ավելի շատ, քան անցած տարիներին: Խնդիրն այլ է. խնդիրը ճգնաժամի և հետևանքների մասին է, և ամեն ինչ չէ, որ պայմանավորված է ֆինանսներով: Շուկան նեղացել է, բնակչության վճարունակությունը՝ քչացել, և այս հանգամանքը մեծ ազդեցություն է ունենում գործարարների վրա: Բայց կամաց-կամաց դուրս ենք գալիս իրավիճակից»,- լավատեսորեն նշել է ՓՄՁԶԱԿ Գյումրու  կառույցի ղեկավար Արթուր Զաքարյանը:

Դերենիկ Մալխասյան

Գյումրի