Աշխարհ

07.04.2017 12:00


«Ազնավուրն այն մարդն է, ով ստիպեց Կրեմլին արտասվել»

«Ազնավուրն այն մարդն է, ով ստիպեց Կրեմլին արտասվել»

Դեռևս ոչ մի արտիստի Կրեմլում այդքան բուռն ծափահարություններով չէին դիմավորել ու ճանապարհել։ Այս մասին հաղորդվում է Ֆրանսիայի միջազգային ռադիոյի (RFI, Radio France internationale) ռուսական ծառայությունում, որն անդրադարձել է աշխարհահռչակ ֆրանսահայ շանսոնյե Շառլ Ազնավուրի՝ ապրիլի 5–ին Մոսկվայում տեղի ունեցած մենահամերգին։

«Սև կոստյումով, սև վերնաշապկով այդ փոքրամարմին ծերունին ոտքի բարձրացրեց ամբողջ դահլիճը՝ ստիպելով բոլորին երգել և ծափահարել, իսկ միջին տարիքից բարձր կանանց՝ վերհիշել երիտասարդությունն ու արտասվել»,-ասվում է հաղրոդագրության մեջ։

Հոդվածի հեղինակ Եկատերինա Բարաբաշը գրում է, որ Ազնավուրը մարդ է՝ առանց տարիքի։ Ի վերջո, առողջ մարմինը դեռևս երիտասարդության նշան չէ, սակայն բանն այն է, որ երգչի մի քիչ թուլացած ձայնը շարունակում է առաջվա պես առնական ու էրոտիկ հնչել:

Լրագրողը նշում է, որ Ազնավուրը Կրեմլում 2 ժամից ավելի ելույթ է ունեցել՝ անձնուրաց երգելով և անտեսելով տարիքն ու դրանից բխող խոչընդոտները:

«Նա ունի հայրենիք՝ Ֆրանսիան, և ունի պատմական հայրենիք՝ Հայաստանը։ Առաջինն Ազնավուրը սիրում է անսահման, իսկ երկրորդի նկատմամբ իրեն մի փոքր պարտական է զգում, ինչպես շատ արտագաղթածներ։ 1988թ. սարսափելի երկրաշարժից հետո Ազնավուրը ստեղծել է ողբերգությունից տուժածների օգնության հիմնադրամ, որը հետագայում դարձավ «Ազնավուրը Հայաստանի համար» ասոցիացիան։ Երևանում կա Ազնավուրի հրապարակը, իսկ Գյումրիում, որտեղ ծնվել է նրա հայրը, կանգնեցրել են հուշարձան։ Ազնավուրի հոր անունը եղել է Միշա, ոչ թե Միխակիլ, այլ Միշա, և եթե նա շարունակեր ապրել Հայաստանում, նրա աշխարհահռչակ որդուն կանվանեին Շահնուր Միշայի Ազնավուրյան»,–գրել է Բարաբաշը։

Համերգից օրեր առաջ Մոսկվայում տեղի է ունեցել նաև Շառլ Ազնավուրի ասուլիսը։

–Ես սիրում եմ իմ աշխատանքը, և ես սիրում եմ իմ հանդիսատեսին։ Այդ 2 բաները ամենակարևորն են արտիստի համար։ Անգամ եթե ես մի փոքր հոգնած եմ լինում, դա ինձ չի կանգնեցնում, ես պետք է առաջ շարժվեմ, գնամ ընդառաջ իմ հանդիսատեսին,– այսպես է նա պատասխանել լրագրողներին։

7or.am

Այս խորագրի վերջին նյութերը