Եվրախորհրդարանում Ադրբեջանի ներկայացուցչությունը, ինչպես նաև Ադրբեջանի ԱԳ նախարարության ներկայացուցիչը բողոքի նոտա են  հղել եվրախորհրդարանի ղեկավար Եժի Բուզեկին' ընդդեմ ՀՀ ԱԺ Եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանի: Դա տեղի է ունեցել այն պատճառով, որ  Եվրախորհրդարանի դեկտեմբերի 1-2-ի նիստին Նաիրա Զոհրաբյանը ԵԽ-ում «Ջուղա. 21-րդ դարի վանդալները» վերնագրով ֆիլմն է ցուցադրել, որտեղ պատմում են, թե ինչպես են ադրբեջանցիները ոչնչացնում հայկական գերեզմանները:

ԵԽ-ում Ադրբեջանի ներկայացուցիչ Էլհան Պոլուխովը դժգոհել է, թե հայկական կողմը խեղաթյուրել է փաստերը, ԵԽ պատգամավորներին թյուրիմացության մեջ գցել, և այդ կապակցությամբ բողոքի նոտա է հղել:

-Ես վստահ եմ, որ Եվրախորհրդարանը սթափ մոտեցում կցուցաբերի ադրբեջանական հերթական անհեթեթությանը, ուստի մենք պատրաստվում ենք շարունակել մեր այս՝ իմ գնահատմամբ ճիշտ, աշխատաոճը,-«7օր»-ին ասել է ՀՀ ԱԺ Եվրոպական ինտեգրման հարցերի մշտական հանձնաժողովի նախագահ, Հայաստան-ԵՄ խորհրդարանական համագործակցության համաժողովի համանախագահ Նաիրա Զոհրաբյանը։

Նա նաև նշել է, որ պատվիրակությունը նախապատրաստվում է ցուցադրել «Բաքու-Մարաղա-Սումգայիթ» ֆիլմը։ Քանի որ ֆիլմը բավական մեծ է և նիստի ընթացքում այն ցուցադրելը տեխնիկապես աննպատակահարմար է, Ն. Զոհրաբյանը դիմել է ԱԺ նախագահ Հովիկ Աբրահայանին՝ այդ ֆիլմերի ավելի փոքր տարբերակը պատրաստելու համար։ Դրանք կցուցադրվեն հաջորդ նիստին, որը, ի դեպ, նախատեսված է Երևանում (2011թ. նոյեմբերին)։

-Մեկ բան վստահ կարող եմ ասել. երբ մենք ԵԽ-ի շենքում ցուցադրեցինք «Ջուղա. 21-րդ դարի վանդալները» ֆիլմը, այն իրապես շատ մեծ տպավորություն թողեց ԵԽ պատգամավորների վրա։ Ֆիլմից հետո դահլիճում երկար ժամանակ քար լռություն տիրեց,-ընդգծել է Նաիրա Զոհրաբյանը։

Նա նաև տեղեկացրել է, որ նիստից դուրս ՀՀ պատվիրակության անդամները բազմաթիվ այլ հանդիպումներ են ունեցել, մասնավորապես ԵԽ պատգամավոր Բերտ Սթայսի հետ, ով առաջիկայում գալու է Հայաստան և Արցախ։ Բերտ Սթայսը նաև զբաղվում է ԵԽ-ից Ջուղա դիտորդական առաքելություն ուղարկելու հարցով։

7or.am