Լեռնային Ղարաբաղի Հանրապետության Ազգային ժողովի նախագահ Աշոտ  Ղուլյանն ընդունել է Եվրախորհրդարանի պատգամավոր, Հայաստանի հարցերով հիմնական զեկուցող Թոմաշ Պորեբային և նրան ուղեկցող անձանց։

Ինչպես հաղորդում է «Ռեգնում» գործակալությունը, ԼՂՀ ԱԺ մամլո ծառայությունը տեղեկացրել է, որ հանդիպման ընթացքում Եվախորհրդարանի ներկայացուցիչը հայտնել է, թե իր այցը ճանաչողական բնույնթ է կրում, և Հայաստանի մասին զեկույցը պատրաստելիս ինքը մեծ նշանակություն է տալիս ղարաբաղյան հակամարտությանը։

- Այն պատճառով, որ մտադիր եմ պատրաստել անկողմնակալ զեկույց, ես չէի կարող չայցելել Լեռնային Ղարաբաղ՝ տեղում ուսումնասիրելու և իմանալու ինչպես  իշխանությունների, այնպես էլ հասարակության դիրքորոշումն այս հարցի վերաբերյալ, ինչպես նաև տեղեկանալու գործընթացի լուծման հետ կապված մի շարք կարևոր հարցերի,-ասել է Թոմաշ Պորեբան։

ԼՂՀ խորհրդարանի խոսնակն իր հերթին ընդգծել է Եվրախորհրդարանի պատգամավորի Արցախ այցի կարևորությունը։

- Վերջին շրջանում արդեն երկրորդ անգամն է, որ Եվրախորհրդարանի ներկայացուցիչներն այցելում են մեր երկիր, որը հիմք է տալիս ենթադրելու, թե միջազգային հանրությունը՝ ի դեմս այս հեղինակավոր կառույցի, սկսել է  ավելի լուրջ հետաքրքրություն ցուցաբերել ղարաբաղյան հակամարտության կարգավորման նկատմամբ,-ասել է նա։

Աշոտ Ղուլյանը նշել է, որ ԼՂՀ ժողովուրդը կառուցում է իր անկախ, ինքնիշխան պետությունը՝ հիմք ընդունելով համընդհանուր, միջազգային չափանիշները՝ ղեկավարվելով պետականաշինության եվրոպական չափանիշներով։

-Լեռնային Ղարաբաղին հաջողվել է կարճ ժամանակահատվածում, առանց օգնության, այդ թվում' միջազգային կառույցների օգնության, այս առումով նշանակալի առաջընթացի հասնել,-շեշտել է նա՝ ավելացնելով, որ բանակցային գործընթացի տեղում դոփելը ԵԱՀԿ Մինսկի խմբի ձևաչափի անլիարժեքությամբ է բացատրվում։