Հայաստանի վարչապետ Նիկոլ Փաշինյանը կոչ է անում մարդկանց հենց այժմ հավաքվել Ազգային ժողովի շենքի մոտ՝ խաղաղ ցույցի:

Ավելի վաղ Փաշինյանը ֆեյսբուքյան ուղիղ հեռարձակմամբ հայտարարել էր, որ մինչև երեկո ժամանակ է տալիս՝ խորհրդարանից հետ կանչելու Ազգային ժողովի կանոնակարգ օրենքում վիճահարույց փոփոխությունների նախագիծը, որը պաշտպանող պատգամավորներին և քաղաքական ւժերին նա անվանել էր հակահեղափոխականներ:

Նշենք, որ ՀՀ ԱԺ նախագահ Արա Բաբլոյանի որոշմամբ, Հայաստանի Հանրապետության Սահմանադրության 100-րդ եւ «Ազգային ժողովի կանոնակարգ» Հայաստանի Հանրապետության սահմանադրական օրենքի 41-րդ հոդվածների համաձայն` Ազգային ժողովի պատգամավորների նախաձեռնությամբ հոկտեմբերի 2-ին` ժամը 19:30-ին, կգումարվի Հայաստանի Հանրապետության Ազգային ժողովի արտահերթ նիստ` նախաձեռնողի սահմանած օրակարգով:

***

Նիկոլ Փաշինյանը ֆեյսբուքյան էր էջում գրել է․ «Քիչ անց Բաղրամյան պողոտայում, ԱԺ դիմաց, ԳԱԱ հարթակից ելույթ կունենամ»:

***

Ազգային ժողովը 67 կողմ ձայով ընդունեց ԱԺ կանոնակարգ օրենքում փոփոխություններ կատարելու մասին նախագիծը:

***

Քաղաքացիները հավաքվում են Բաղրամյան պողոտայում, այնտեղ է նաև Նիկոլ Փաշինյանը։

***

ԱԺ ՀՀԿ խմբակցության պատգամավոր Արմեն Աշոտյանը հայտնեց, որ նախագծին կողմ են քվեարկել ՀՀԿ-ն, «Ծառուկյան» խմբակցությունն ու ՀՅԴ-ն:

ՀՀ Ազգային ժողովի փոխնախագահ Էդուարդ Շարմազանովը ընդգծեց, որ քվեարկությունը քարտերով չի իրականացվել, այլ ձեռքով:

***

ԱԺ շենքի մուտքը Դեմիրճյան փողոցի կողմից փակ է:

***

Ազգային ժողովի ՀՅԴ խմբակցության ղեկավար Արմեն Ռուստամյանը կառավարությունից ՀՅԴ-ական նախարարներին հետ կանչելու հնարավորությունը հնարավոր է համարում:

***

Քիչ առաջ ԱԺ կայքում հրապարակվեց պատգամավորների անհատական քվեարկությունների ցանկը, որին կարող եք ծանոթանալ այս հղմամբ։

***

Նիկոլ Փաշինյանը հանրապետության մյուս քաղաքների բնակիչներին կոչ է անում ի նշան միասնության դուրս գալ իրենց քաղաքների կենտրոնական հրապարակներ:

***

Հենց նոր ցուցարարները՝ Նիկոլ Փաշինյանի գլխավորությամբ, մտան խորհրդարանի տարածք։ Փաշինյանը հորդորեց շենք չմտնել, միայն նա մտավ ԱԺ՝ բանակցություններ վարելու։

***

ՀՀ վարչապետ Նիկոլ Փաշինյանը հրաժարական կտա, երբ ՀՅԴ-ն և ԲՀԿ-ն ներկայացնող նախարարների ու մարզպետների աշխատանքից ազատելու մասին որոշումը դե յուրե կմտնի ուժի մեջ: «Արմենպրես»-ի փոխանցմամբ` այս մասին հոկտեմբերի 2-ին ԱԺ մերձակայքում կայացած հանրահավաքում հայտնեց Նիկոլ Փաշինյանը:

ՀՀ վարչապետի խոսքով` նա այդ քայլին կգնա այն բանից հետո, երբ աշխատանքից ազատեց ՀՅԴ և ԲՀԿ ներկայացուցիչ նախարարներին ու մարզպետներին:

«Երբ նշված նախարարների ու մարզպետների աշխատանքից ազատելու մասին որոշումը դե յուրե կմտնի ուժի մեջ, դրանից հետո ես հրաժարական կտամ վարչապետի պաշտոնից: Նախ` որպեսզի որևէ մեկը չմտածի, թե ես կառչած եմ ՀՀ վարչապետի պաշտոնից: Դրանից հետո 7+1 օրվա ընթացքում ԱԺ-ն պետք է ընտրի նոր վարչապետ: Եթե այդ ընթացքում չընտրվի նոր վարչապետ, պետք է ևս 7+1 օր ժամանակ անցնի, և ընտրի նոր վարչապետ: Եթե այդ ընթացքում չընտրեց նոր վարչապետ, տեղի են ունենում արտահերթ խորհրդարանական ընտրություններ:

Եթե կպարզվի, որ ժողովուրդը կանգնած է հանուն արտահերթ խորհրդարանական ընտրությունների, մենք ժողովրդի հետ կկարողանանք թույլ չտալ, որ խորհրդարանն ընտրի նոր վարչապետ: Բայց հրաժարականից հետո ողջ ընթացքում ես շարունակում եմ կատարել ՀՀ վարչապետի պարտականությունները. այդպես է ՀՀ Սահմանադրությամբ»,- ասաց նա:

Նիկոլ Փաշինյանը ՀՀ նախագահին հորդորեց չստորագրել ԱԺ-ի կողմից այսօր ընդունված ԱԺ կանոնակարգ օրենքի փոփոխությունները:

«Պետք է հանրապետության նախագահը ստորագրի այդ օրենքը կամ դիմի Սահմանադրական դատարան` դրա սահմանադրականությունը վիճարկելու համար: Կարծում եմ` ինձ կլիազորեք, որ ես հիմա այստեղից դիմեմ ՀՀ նախագահ Արմեն Սարգսյանին` կոչ անելով, որ նա այդ օրենքը չստորագրի ու դիմի Սահմանադրական դատարան»,-ասաց Փաշինյանը:

ՀՀ վարչապետը հայտնեց, որ պատրաստվում է գնալ խորհրդարան` պատգամավորների հետ ստեղծված իրավիճակը քննարկելու համար:

«2018թ.-ի ապրիլի 16-ին ես, որպես ԱԺ «Ելք» խմբակցության ղեկավար ուզում էի գնալ ԱԺ, հիմա ես, որպես ՀՀ վարչապետ, 24 ժամ իրավունք ունեմ մուտք գործել խորհրդարանի տարածք: Ես կգնամ, որպեսզի նաև բանակցեմ այնտեղ գտնվող պատգամավորների ու քաղաքական ուժերի հետ` ստեղծված իրավիճակը հաղթահարելու վերաբերյալ, և մենք դա կանենք սիրո ու համերաշխության մթնոլորտում»,- նշեց նա:

Նիկոլ Փաշինյանը ԱԺ մուտք գործեց Դեմիրճյան փողոցից, նրա հետևից խորհրդարանի բակ են մտել հանրահավաքի մասնակիցներ:

***

Նիկոլ Փաշինյանն այս պահին Ազգային ժողովի նախագահ Արա Բաբլոյանի աշխատասենյակում բանակցություններ է վարում խորհրդարանական խմբակցությունների ներկայացուցիչների հետ:

***

Բանակցություններն ավարտվեցին, Նիկոլ Փաշինյանը ներկայացրեց արդյունքները։ Նա ասաց, որ այսօր լուծեցին մեկ քաղաքական խնդիր՝ ցույց տվեցին, որ Հայաստանում արտահերթ խորհրադանական ընտրություններ անցկացնելը քաղաքացիական համաժողովրդական համազգային պահանջ է, և այն քաղաքական ուժերը, որոնք դեմ կգնան այդ պահանջին, նրանք ուղիղ պատերազմ են հայտարարում սեփական ժողովրդին։

Փաշինյանն ասաց, որ իր տպավորությամբ այդ ուղերձը ՀՀԿ-ի, ՀՅԴ-ի և Ծառուկյան դաշինքի կողմից ընկալված է, բայց որևէ գրավոր և բանավոր վերջնական պայմանավորվածություն չկա․ միայն ասել են, որ պարզ է՝ այս իրավիճակում չեն պատրաստվում վարչապետի թեկնածու առաջադրել։

Փաշինյանը նաև ընդգծել է, որ հեռախոսազրույց է ունեցել ՀՀ նախագահ Արմեն Սարգսյանի հետ և Փաշինյանի տպավորությամբ՝ նա ժողովրդի դեմ որևէ քայլ չի անի։ ՀՀ վարչապետը տեղեկացրեց, որ առաջիկայում հրաժարական կտա իր պաշտոնից՝ մնալով վարչապետի պաշտոնակատար, և հրաժարական կտա անկախ այն բանից, թե քաղաքական մյուս ուժերի հետ ակնկալվող հուշագիրը կստորագրվի, թե ոչ։

7or.am