EarthAlliance բարեգործական կազմակերպությունը, որի հիմնադիրներից մեկը Լեոնարդո Դի Կապրիոն Է, հինգ միլիոն դոլար կուղարկի Ամազոնիայի տարածաշրջանին օգնելու համար, որը տուժել Է անտառային հրդեհներից, տեղեկացնում Է «Արմենպրես»-ը:

«EarthAlliance-ն Ամազոնիայի անտառներին արտակարգ օգնության ֆոնդ Է ստեղծել 5 մլն դոլար բյուջեով, որպեսզի կարեւորագույն ռեսուրսներ տրամադրի տեղի բնակչությանը եւ այնտեղ գտնվող գործընկերներին, որոնք աշխատում են Ամազոնիայի կենսաբանական բազմազանությունը փրկել հրդեհների ալիքից»,- ասված Է Twitter-ում կազմակերպության զետեղած հաղորդագրության մեջ:

Ավելի վաղ Ֆրանսիայի նախագահ Էմանուել Մակրոնը հայտարարել Է, որ G7-ը մոտավորապես 20 մլն եվրոյի չափով շտապ օգնություն կուղարկի Ամազոնիայում մոլեգնող անտառային հրդեհները մարելու համար: Կանադան նույնպես խոստացել Է հատկացնել 15 մլն դոլար: Երկրի նախաձեռնությունը չի մտնում ընդհանուր օգնության այն փաթեթի մեջ, որը համաձայնեցվել Է «Մեծ յոթնյակի» հանդիպմանը:

Սաստիկ հրդեհները Ամազոնիայի անտառներում մոլեգնում են արդեն շաբաթներ, դրանց մակերեսը 82 տոկոսով ավելի Է, քան ամբողջ 2018 թվականին կրակի ճարակ դարձած տարածքը: Ընթացիկ տարում Բրազիլիայում տեղի են ունեցել արդեն ավելի քան 78 հազար անտառային հրդեհ. դա վատագույն ցուցանիշն Է 2013 թվականից ի վեր:

Բրազիլիայի Տիեզերական հետազոտությունների ազգային ինստիտուտի (Inpe) վերջին տվյաների համաձայն՝ հունվար ամսից մինչեւ օգոստոս հրդեհները ոչնչացրել են Ամազոնիայի ավելի քան 1,8 մլն հեկտար անտառներ, որոնք գտնվում են հարավամերիկյան խոշորագույն երկրի տարածքում: Ընդ որում Ամազոնիան հրդեհներից առավել մեծ կորուստներ Է կրել մարտին, երբ այրվեց նրա կես միլիոնից ավելի հեկտար տարածք, հաղորդել Է ՌԻԱ Նովոստի գործակալությունը: