ԱՄՆ ռազմական ինքնաթիռները ապրիլի 4–ին հարվածներ են հասցրել Մուամար Քադաֆիի բանակի ուղղությամբ Սիրտ ու Մարսա–Բրեգա քաղաքներում։ Օդային հարձակմանը մասնակցել են ԱՄՆ ռազմաօդային ուժերի և ծովային հետևակի կորպուսը։

Հայտնի է, որ Մարսա–Բրեգան ռմբակոծել են ամերիկյան ռազմաօդային ուժերի A-10 Thunderbolt ինքնաթիռները, իսկ Սիրտ քաղաքը՝ ծովային հետևակին պատկանող AV-8B Harrier կործանիչ–ռմբակոծիչները։ Ինչպես փոխանցում է «Associated Press»–ը՝ այս մասին հաղորդում է ԱՄՆ կառավարության աղբյուրը։

Թե քանի օդային հարված է հասցվել ու թե ինչ օբյեկտներ են տուժել, զրուցակիցը չի պարզաբանել։ Սակայն նա հավելել է, որ, իր տվյալներով` Մարսա–Բրեգայում մարտերը դեռ շարունակվում են, առայժմ այն գտնվում է Լիբիայի կառավարական զորքերի վերահսկողության տակ։