Եվրոպայի հեռարձակողների միությունն (EBU) ու Ադրբեջանի հանրային հեռուստաընկերությունը քննարկել են Բաքվում կայանալիք «Եվրատեսիլ–2012» մրցույթի անցկացման առաջին քայլերը։ Հանդիպումը կայացել է Եվրոպայի հեռարձակողների միության Ժնևի գրասենյակում։

«EBU»–ն նախ և առաջ ադրբեջանական պատվիրակությանը ծանոթացրել է մրցույթի անցկացման կանոններին, իսկ ադրբեջանական պատվիրակությունը ներկայացրել  է մրցույթի  անցկացման ծրագրերի, մասնավորապես հյուրանոցների, տրանսպորտի, օդանավակայանի և այլ մանրամասների մասին։

«EBU»–ն նախազգուշացրել է Ադրբեջանին, որ իրենց լոգոն կարող է օգտագործվել միայն թույլտվություն ստանալուց հետո, ինչպես նաև այն, որ Մարդու իրավունքների եվրոպական կոնվենցիայի 10–րդ կետի  համաձայն՝ մրցույթին մասնակից լրագրողների համար պետք է ապահովվի խոսքի ազատություն։

Հատկանշական է, որ առաջին անգամ, բացի ամենանգամյա պարտադիր զգուշացումներից,  «EBU»–ն Ադրբեջանի իշխանություններից պահանջել է մասնակիցների, ինչպես նաև մրցույթի շրջանակներում երկիր  ժամանած մարդկանց, լրագրողների, երկրպագուների անվտանգության ապահովում, որը պետք է իրականացվի առանց խնդիրների։

Հանդիպման ժամանակ նաև որոշվել է մրցույթի անցկացման օրը։ Կիսաեզրափակիչը տեղի  կունենա 2012թ. մայիսի 22–ին և 24–ին, իսկ եզրափակիչը՝ մայիսի 26–ին։