Բրիտանական «The Guardian» թերթը հաղորդում է, որ Սիրիայի արևմուտքում գտնվող Համա քաղաքում ավելի քան 700 ցուցարար է կալանավորվել վերջին օրերի ընթացքում։

Որոշ տվյալներով՝ ցուցարարների և զինվորականների բախումների հետևանքով Համայում զոհվել է 24 մարդ։ Սիրիացի իրավապաշտպանների խոսքերով՝ ավելի քան հազար բնակիչ է փախել քաղաքից։

Ինչպես հաղորդվում է, սիրիացի զինվորականները երկուշաբթի որոնողական աշխատանքներ և ձերբակալություններ են իրականացրել Համայում։

Տեղի բնակիչները արգելապատնեշներ են սարքել, որպեսզի դանդաղեցնեն  զինվորականների ընթացքը։ Արդյունքում զինվորականների և բողոքի ակցիայի մասնակիցների միջև բախումներ են սկսվել։

Համայի ռազմական գործողությունն սկսվել է այն բանից հետո, երբ նախորդ շաբաթ բողոքի զանգվածային ցույց է տեղի ունեցել երկրի նախագահ Բաշար Ասադի դեմ։