«Ֆրանս Պրես» գործակալությունը հաղորդում է, որ Լիբիայի առաջնորդ Մուամար Քադաֆիի հակառակորդները կիրակի փակել են Զուվարահ քաղաքի գործարանին նավթ մատակարարող նավթամուղը, որպեսզի խոչընդոտեն երկրի արևմուտքում կառավարական զորքերի մատակարարումը։

«Նավթը պատկանում է բոլոր լիբիացիներին և ոչ թե Քադաֆիին, այլևս նա չի կարողանա այն մեր դեմ օգտագործել»,–հայտարարել են ապստամբների ներկայացուցիչները։

Գործակալության տվյալներով՝ նավթամուղի կասեցման գործողությանը մասնակցել է մոտ 20 ապստամբ։

Մի քանի օր առաջ ապստամբները փակել էին Էզ–Զավիա քաղաքին մատակարարող նավթամուղը։ Երկու նավթամուղներն էլ մասնավորապես նավթ էին մատակարարում մայրաքաղաք Տրիպոլիին։