Սեպտեմբերի 1–ին՝ ժամը 11։00–ից, կառավարության շենքի դիմաց բողոքի գործողություն է տեղի ունենալու՝ «Բանակն առանց մարդասպանների» պահանջով։ Կազմակերպիչների խոսքերով՝ իրենք՝ բանակում տիրող բարոյալքությամբ և մեր զինվորների կյանքի ու առողջության համար մտահոգ քաղաքացիները, դատապարտում են բանակում տիրող հանցավոր իրավիճակը և կոչ են անում սատարել սպանվածների մայրերին՝ հինգշաբթի օրը սև հագուստներով գալով կառավարության շենքի մոտ:

«Օգստոսի 26-ին «Եղնիկներ» զորամասում բռնի մահով զոհվել է 18-ամյա երևանցի Աղասի Աբրահամյանը: Օգոստոսի 19-ին Գորիսի զորամասում զոհվել է Ճամբարակի բնակիչ 19-ամյա Վարդան Սևյանը: Տղաների մարմնի վրա խոշտանգման բազմաթիվ հետքեր են հայտնաբերվել, որ վկայում են դիտավորյալ սպանության մասին, մինչդեռ պաշտոնապես առաջ են քաշվել այլ վարկածներ: Այս տարվա ընթացքում արդեն 19 մահվան դեպք է արձանագրվել: Մինչդեռ բռնությունների զոհերի թիվը շատ ավելին է. չկան տվյալներ, թե քանի երիտասարդ է ենթարկվում բռնության, բռնաբարության, թե քանիսն են դառնում հաշմանդամ հայոց բանակում ծառայելիս: Պահանջում ենք վերջ տալ բանակում տիրող հանցագործ բարքերին, վերջ տալ քրեադատավարական կեղծիքին և հանցագործների հովանավորչությանը, իրականացնել արդար դատաքննություն արդեն կատարված դեպքերով և խստորեն պատժել մեղավորներին»,–ասված է հաղորդագրության մեջ:

7or.am