Այժմ դրամի ռևալվացիայի գործոններն ավելի ուժեղ են, քան դևալվացիայի գործոնները։ Այս մասին NEWS.am-ի հետ զրույցում ասաց ՀՅԴ տնտեսական հարցերի գրասենյակի ղեկավար Սուրեն Պարսյանը։

Նա պարզաբանեց, որ քանի դեռ Ռուսաստանից ռուսաստանցիների և փողերի հոսքը շարունակվում է, դոլարի փոխարժեքը կպահպանվի 410 դրամի սահմաններում։ Նրա խոսքով՝ դոլարային հոսքի վրա ազդում են նաև 2,5 միլիարդ դոլարի տրանսֆերտները, մետաղների գների աճով պայմանավորված արտահանման աճը, պետական ​​պարտքի աճը (միևնույն ժամանակ դոլարով պարտքը նվազել է, իսկ դրամով՝ աճել):

«Ռազմական իրավիճակի հետ կապված բացասական սպասելիքները ևս ազդում են դոլարի վրա։ Սեպտեմբերին ռազմական գործողությունների ժամանակ դոլարը թանկացավ, սակայն Ռուսաստանում հայտարարված մասնակի մոբիլիզացիան մեծացրեց ռուբլու ծավալը Հայաստանում և հանգեցրեց դոլարի ծավալի նվազման»,-նշեց Պարսյանը։

Փորձագետը հիշեցրեց նաև կառավարության կողմից կապիտալ ծախսերի 41 տոկոսի չկատարման մասին։ «Սա խոսում է այն մասին, որ հնարավոր չի եղել իրականացնել շինարարական ծրագրեր, ինչը հանգեցնում է դրամի ռևալվացիայի և խնդիրներ ստեղծում բնակչության համար»,-հավելեց նա։