«Ռոյթերս» գործակալությունը հաղորդում է, որ ԱՄՆ պետքարտուղար Հիլարի Քլինթոնը Նյու–Յորքում բանակցություններ է վարելու Պաղեստինի նախագահ Մահմուդ Աբբասի և Իսրայելի վարչապետ Բենիամին Նեթանիահուի հետ։

Բանակցությունները տեղի են ունենալու Աբբասի և Նեթանիահուի՝ ԱՄՆ նախագահ Բարաք Օբամայի հետ ունեցած հանդիպումից հետո։ Երկկողմանի հանդիպումների կազմակերպումը նպատակ ունի վերսկսելու Իսրայելի և Պաղեստինի միջև մոտ մեկ տարի առաջ դադարեցված խաղաղ բանակցությունները։

Ինչպես սպասվում է, սեպտեմպերի 23–ին պաղեստինյան ազգային վարչակազմի ղեկավար Մահմուդ Աբբասը ՄԱԿ–ի անդամակցության հայտ է ներկայացնելու։ Միացյալ Նահանգներն ու Իսրայելը Պաղեստինին զգուշացնում են, որ պաղեստինցիների միակողմանի քայլերը կարող են միայն խարխլել բանակցությունների ընթացքը, այդ պատճառով էլ Վաշինգտոնն օգտագործելու է իր վետո իրավունքը ՄԱԿ–ի Անվտանգության խորհրդում այդ մտադրությունը կանխելու նպատակով։