ԱԺ ՀՅԴ խմբակցության անդամ Լիլիթ Գալստյանն ԱԺ ՀՀԿ խմբակցության պատգամավոր Արտակ Զաքարյանի հետ համատեղ ասուլիսում ասել է, որ մեր իրականության մասին ընդդիմությունից շատ ավելի խիստ հայտարարություններով հանդես են գալիս ՀՀ նախագահը և վարչապետը, սակայն դրանք որևէ արժեք չունեն, քանի որ մնում են կեղծ բարոյախոսության շարքում, եթե չկան համապատասխան գործողություններ։

Արտակ Զաքարյանը հակադարձել է, որ բոլորս էլ նույն երկրում ենք ապրում և տեսնում ենք տեղի ունեցող դրական և բացասական երևույթները, բայց չի կարելի ասել, որ ոչինչ տեղի չի ունեցել, ու միայն պսևդոարժեքներն են գերակայում։

Լիլիթ Գալստյանը մի շարք ցուցանիշներ է բերել, համաձայն որոնց՝ նախորդ ամսվա համեմատ 18%–ով տնտեսական անկում կա, իսկ արտահանումը նվազել է 21%–ով։

–Այս ցուցանիշների լավագույն արտահայտությունը նախորդ տարվա համեմատ արձանագրված ահռելի արտագաղթն է,–պնդել է Լ. Գալստյանը։

ՀՀԿ–ական պատգամավորը նշել է, որ այդ ամենի պատճառը տնտեսական ճգնաժամն է, իսկ դրա հաղթահարումը կախված է առկա ներքին և արտաքին ռեսուրսներից։

Սակայն Լիլիթ Գալստյանը նշել է, որ ներքին ռեսուրսների մեջ մտնում է նաև արդյունավետ կառավարումը։

–Երբ երկիրը կառավարում են մարդիկ, ովքեր բյուջեի քննարկման ժամանակ շարիկ գլորելով են զբաղված, և նախարարներ, ովքեր անգործության են մատնված, դա ցույց է տալիս կառավարման անարդյունավետությունը,–նկատել է ՀՅԴ պատգամավորը՝ հավելելով,–եթե չլիներ տնտեսական ճգնաժամը, ինչի՞ց պիտի կառչեր կառավարությունը։

–Եթե հայտարարում ես, որ հավատարիմ ես եվրոպական արժեքներին և սեփական երկրում իշխանությունն իրականացնում ես արևելյան երկրի կլանային տիպի համակարգով, որտեղ ընտանեկան թայֆայությունները ժառանգական արմատավորում են ստանում, այդ ամենը զրոյի է հավասարվում,–ասել է Լ. Գալստյանը և ավելացրել,–գնալով խալիֆայություն ենք դառնում։

7or.am