ԱՄՆ պետքարտուղար Հիլլարի Քլինթոնը հայտարարել է, որ Միացյալ Նահանգները չի գնա Ֆրանսիայի ճանապարհով ու  չի քրեականացնի Հայոց ցեղասպանության ժխտումը։ Այս մասին տեղեկացնում է «Վեստի»–ն։

«Մեր ամենաուժեղ կողմերից մեկն այն է, որ մենք չենք քրեականացնում մարդկանց հայտարարությունները։ Մարդիկ կարող են ասել գրեթե ամեն ինչ, և մեր երկրում այդպես էլ կա։ Այլ երկրների մոտ, այդ թվում՝ նաև մեր մոտ ընկերների ու դաշնակիցների, ինչպիսին է նաև Ֆրանսիան, այլ չափանիշներ են։ Բայց մենք, ես հուսով եմ, երբեք չենք գնա մարդկանց արտահայտությունները քրեականացնելու ուղիով»,–Քլինթոնի խոսքերը մեջբերում է լրատվամիջոցը։

Ինչպես հայտնի է՝ ԱՄՆ–ը դեռևս չի ճանաչել Հայոց ցեղասպանությունը։

Հիշեցնենք, որ Ֆրանսիայի Սենատը հունվարի 23-ի լույս 24-ի գիշերը ձայների 127 կողմ և 86 դեմ հարաբերակցությամբ ընդունել է ցեղասպանությունների ժխտումը քրեականացնելու մասին օրինագիծը։ Խոսքը մասնավորապես վերաբերում է Հայոց ցեղասպանությանը։ Ինչ վերաբերում է հրեական Հոլոքոստին, ապա դրա ժխտումը քրեականացնելու վերաբերյալ օրինագիծը գործում է 1990թ. սկսած։

Միաժամանակ, հունվարի 25-ին հայտնի դարձավ, որ օրինագծի դեմ հանդես եկած սենատորները պատրաստվում են Սենատի որոշումը բողոքարկել Սահմանադրական դատարանում և անհրաժեշտ ստորագրություններ են հավաքում։