Այսօր խորհրդարանական ճեպազրույցի ժամանակ Հայ ազգային կոնգրես խմբակցության ղեկավար Լևոն Զուրաբյանն ասել է, որ երեկ՝ գազի գնի վերաբերյալ խորհրդարանական քննարկման ժամանակ, սենսացիա են բացահայտել։

–ՀԾԿՀ–ն մայիսի 13-ին է ստացել գազի գնի բարձրացման հայտը, որին կցված փաստաթղթի համաձայն՝ գազի նոր գնի մասին պայմանագիրը ուժի մեջ է մտել ապրիլի 1-ից: Փաստորեն, ապրիլի 1–ից գործել է նոր գինը և կա դա հաստատող պաշտոնական պայմանագիրը։ Սակայն մեր իշխանությունները դրա մասին տեղյակ չեն պահել հասարկությանը: Այդ ինֆորմացիան հասարակությունից թաքցրել են ապրիլի 1-ից սկսած,-ընդգծել է Լ. Զուրաբյանը։

ՀԱԿ խմբակցության ղեկավարը վստահ է, որ իշխանությունները պարզապես չեն ուզեցել այս մայիսի 5–ին կայացած Երևանի ավագանու ընտրություններից առաջ հայտնել բարձրացած գազի գնի մասին:

Լ. Զուրաբյանն անդրադարձել է նաև այս քառօրյայում ՀՀԿ խմբակցության ղեկավար Գալուստ Սահակյանի ելույթներին և նշել, որ նա պատմության մեջ կմնա իր տափակ շուլուխներով:

–Հիշեք Չեռնոմիրդինին, ով հայտնի էր իր շուլուխներով։ Դրանք, ճիշտ է, տափակ էին, բայց հիմա «Վիքիպեդիայում» կան, և բոլորը օգտագործում են,–հավելել է Լ. Զուրաբյանը:

7or.am