ԿԲ նախագահ Արթուր Ջավադյանն ասել է, որ ԱՊՀ երկրներից ամենալավ ֆինանասկան համակարգը Հայաստանինն է։

-Մենք ոչ թե գլուխ ենք  գովում, այլ  իրավիճակն է այդպիսին։ Ես  ձեզ վստահեցնում եմ, որ այս պահին  շատ-շատ կենտրոնական բանկեր սովորում են մեզանից, գոնե՝  վերահսկողության ոլորտում։ Մենք ԱՊՀ երկրներում միակն ենք, որ չունեցանք որևէ խնդիր որևէ ֆինանսական հաստատության հետ. դա փաստ է,-հավելել է նա։

Արթուր Ջավադյանը նշել է, որ անցած տարվա հունիսից մինչև այս տարվա հունիսը մենք արձանագրել ենք 3,6% գնաճ, որն ավելի ցածր է կանխատեսված 4,5%-ից։

-Մենք  հույս ունեք, որ գնաճ չենք ունենա։ Այն  միջոցառումները, որոնք իրականացնում է  ՀՀ կառավարությունը և ԿԲ -ն,  նպաստելու են տնտեսական աճին,-նշել է նա։

«7օր»-ի հարցին, թե բյուջետային մուտքերի թերակատարման դեպքում, արդյոք, բացառվո՞ւմ է, որ  ծավալային մասը իրականացվի  դրամական էմիսիայի միջոցով, Արթուր Ջավադյանը պատասխանել է, թե մենք արդեն իսկ իրականացնում ենք դրամական էմիսիա։

-Այն վարկերը, որ մենք ստացել ենք, թեկուզ ռուսական վարկը, տրամադրվել է դոլարով, որն ամբողջությամբ փոխանակվել  է դրամի,  և մենք, ըստ էության, իրականացնում ենք դրամական էմիսիա,-ասել է նա։

ԿԲ նախագահի խոսքերով՝  ամբողջ աշխարհից Հայաստան է ներմուծվել գնանկումային տրամադրություն, և դա  տարբեր տիպի ապրանքատեսակների ներմուծմամբ է տեղի ունենում։

-Աշխարհի տարբեր երկրներ իրենց տնտեսության մեջ իրականացնում են տարբեր տիպի ներարկումներ։  Հետագայի հարց է, թե ինչպես կկարողանան պայքարել այդպիսի երևույթների դեմ,-խոսելով դրամական էմիսիայի հետագա ազդեցություններ մասին՝ ասել է Արթուր Ջավադյանը։

Նա նշել է, թե կարևորն այն է, որ ճգանաժամը շուտ ավարտվի։

- Դրանից հետո մենք միջոցառումներ կպատարաստենք, թե ինչպես ենք պայքարելու այդ երևույթի դեմ, բայց դե մենք միայնակ չենք լինելու. ամբողջ աշխարհն է դրա դեմ պայքարելու։ Ցանակացած ճգնաժամից հետո, մանավանդ՝ գլոբալ տնտեսական ճգնաժամից, այսպիսի երևույթներ  ի հայտ են գալիս, և դրանց մասին խոսելը վաղ է,- ասել է ԿԲ Արթուր Ջավադյանը։

Հեղինե Հարությունյան