Դեռևս հունիսի 9-ին Գյումրիում գտնվող կառավարական պատվիրակությունը՝ փոխվարչապետ Արմեն Գևորգյանի գլխավորությամբ, գյումրեցիներին ավետեց, որ շատ շուտով հանրապետության երկրորդ քաղաքը վերածվելու է «տեխնոքաղաքի», և արդեն ընտրվում են տեխնոզոնաները, որտեղ տեղակայվելու են համապատասխան ենթակառուցվածքները:

Կառավարության ներկայացուցիչները հենց փողոցում խորհրդակցություն անցկացրին և լրատվամիջոցների ներկայացուցիչների միջոցով գյումրեցիներին ծանոթացրին ապագա տեխնոքաղաքի կառույցներին, որոնք պետք է ապահովեն հանարապետության երկրորդ քաղաքի բարեկեցությունը:

Այն ժամանակ էկոնոմիկայի նախարար Ներսես Երիցյանը նշեց, թե գաղափարի իրականցումն այնքան մոտ է, որ իրենք եկել  են Գյումրի՝ տեղում ծանոթանալու  ծրագրին, որն արդեն գործնական փուլի մեջ է:

Այսօր, սակայն, Գյումրիում կյանքն ընթանում է իր նախկին հունով, և գրեթե ոչ ոք հույս չունի, որ մոտ ապագայում ինքը կդառնա տեխնոքաղաքի բնակիչ: Նույնիսկ մարզային բարձրաստիճան պաշտոնյանները, որոնք, բնականաբար, չեն ցանականում ներկայանալ, նշում են, որ կառավարության ձեռնարկած այս ծրագիրը իրականում հեքիաթ է, և իրենք հույս չունեն, թե այն երբևէ  իրականություն կդառնա:

Փորձեցինք մարզային և քաղաքային իշխանություններից ճշտել, թե տեխնոքաղաքի գաղափարը իրականություն դարձնելու ուղղությամբ ներկայումս  ի՞նչ կոնկրետ գործնական քայլեր են իրականացվում:

Գյումրու քաղաքապետարանից լրատավության բաժնի պետ Լիլիթ Աղեկյանը  «7օր»-ին պատասխանեց.

-Կարող եմ ասել, որ մեր կողմից տարածքների տրամադրաման հարցում որևէ խոչընդոտ չի հարուցվում:

Իսկ այն հարցին, թե արդյոք քաղաքապետարանին արդեն դիմե՞լ են՝ տարածքներ տրամադրելու համար, նա կոնկրետ պատասխան չկարողացավ տալ.

-Դա պետական ծրագիր է, մարզպետարանն է զբաղվում, իրենք ավելի ստույգ կկարողանան պատասխանել:

Շիրակի մարզպետարանի ծրագրերի և սոցիալ-տնտեսական զարգացման բաժնի պետ Մարտին Տոնոյանը նույն հարցի կապակցությամբ հետևյալ մեկնաբանությունը տվեց.

-Ծրագիրը դեռևս ուսումնասիրության փուլում է, տարածքների առումով ինֆորմացիայի չեմ տիրապետում, ստույգ չեմ կարող ասել։ Դիմեք էկոնոմիկայի նախարարություն, իրենք գիտեն:

«7օր»-ի՝ «Ինչքա՞ն ժամանակ կպահանջվի, որ Գյումրին վերջնականապես վերածվի տեխնոքաղաքի» հարցին Մարտին Տոնոյանը պատասխանեց.

-Դե, իմ կարծիքով՝ առնվազն 5 տարի կպահանջվի:

Դերենիկ Մալխասյան

Գյումրի