ԲՀԿ նախագահ Գագիկ Ծառուկյանի հրավիրած խորհրդաժողովի ժամանակ քաղաքագետ Երվանդ Բոզոյանն ընդգծել է, որ ամենագլխավոր ճգնաժամը վստահության ճգնաժամն է այսօրվա իշխանության նկատմամբ։

–Եթե անգամ իշխանությունները լավագույն ծրագիրը ներկայացնեն, միևնույն է՝ վստահության բացակայության պատճառով այն ձախողման է դատապարտված։ Այսօրվա այս հավաքը մեկ նպատակ է հետապնդում՝ իր շուրջ կոնսոլիդացնել այլընտրանքային բևեռը, որը կառաջարկի իր «ճանապարհային քարտեզը» այս ճգնաժամից դուրս գալու համար։ Եթե իշխանությունը սթափ գիտակցի, որ պետք է գնալ կոմպրոմիսի, ապա Հայաստանում պրոցեսները կգնան ավելի հանդարտ ճանապարհով։ Իսկ եթե իշխանությունը փորձի իր վերարտադրության համար գնալ սահմանադրական փոփոխությունների, ապա Սահմանադրության հանրաքվեն կվերածվի վստահության հանրաքվեի, և սահուն կերպով կանցնի արտահերթ նախագահական ընտրությունների,–ասել է Ե. Բոզոյանը։

Նա կարծում է, որ իշխանության մեջ էլ պետք է լինեն մարդիկ, ովքեր հասկանում են սա։ Իսկ ձևավորված այս այլընտրանքային բևեռը, քաղաքագետի համոզմամբ, ունի շատ կարևոր առավելություն.

–Դրա լիդերն ունի հեղինակություն թե՛ հասարակության, թե՛ գործարար խավի և թե՛ իշխանության շատ շրջանակների մեջ։ Սա շանս է, որ իշխանափոխությունը կատարվի առանց «վհուկների որսի», քանի որ երկրում ցնցումները լինում են նաև այն պատճառով, որ քաղաքական վերնախավում լինում է կապիտալի վերաբաշխում։ Իշխանությունն իր համար պետք է պատմական որոշում կայացնի։ Եթե ճիշտ որոշում կայացնի, ապա Հայաստանը կարող է գնալ Վրաստանի և նույնիսկ է՛լ ավելի լավ ճանապարհով։ Բայց եթե գնաց սխալ ճանապարհով և փորձեց վերարտադրվել, ապա հանրությունը կարձագանքի շատ խիստ։ Հանրության բացարձակ մեծամասնությունը դեմ է սահմանադրական փոփոխություններին,–նշել է Ե. Բոզոյանը։

7or.am