Փարիզի դատախազ Ֆրանսուա Մուլենը հայտնել է, որ Ֆրանսիայի մայրաքաղաքում տեղի ունեցած ահաբեկչությունների զոհերի թիվը հասել է 129–ի, վիրավորներինը՝ 352–ի, որոնցից 99-ի վիճակը գնահատվում է ծայրահեղ ծանր:

Դատախազը նաև նշել է, որ ահաբեկիչներից 7–ը ոչնչացվել են համերգասրահի գրոհի ժամանակ, և ավելացրել՝ ընդհանուր առմամբ գործել է ահաբեկիչների երեք խումբ։

Leparisien-ը ներկայացրել է ահաբեկչությունների շարքի ժամանակագրությունը։

Առաջին պայթյունը՝ ժամը 21.20-ին, որոտացել է Սթադ դե Ֆրանս մարզադաշտի մոտ: Դրանից 5 րոպե անց տեղի են ունեցել մյուս պայթյուններն ամբողջ Փարիզի տարածքով:

Seat leon մեքենայից 15 ահաբեկիչ Կալաշնիկով ինքնաձիգով գնդակահարել է Le Carillon բարի և Le Petit Cambodge ռեստորանի այցելուներին։

Կրկին Seat leon մեքենայից ժամը 21:32–ին գնդակահարվել են Faubourg-du-Temple և de la Fontaine-au-Roi փողոցներում գտնվող բարի մոտ նստած այցելուները։ Զոհվել է 5, վիրավորվել՝ 8 մարդ: Այդ նույն ժամանակ 2–րդ պայթյունն է հնչել Սթադ դե Ֆրանս մարզադաշտի մոտ:

Ժամը 21:40–ին մահապարտ ահաբեկիչն իրեն պայթեցրել է Voltaire այգում՝ Comptoir Voltaire ռեստորանի մոտ:

Այդ ընթացքում ահաբեկիչներից 3–ը Polo մեքենայով ժամանել են «Բատակլան» թատրոնի և գնդակահարել ռոք համերգի հանդիսատեսին՝ նրանց մի մասին պատանդ վերցնելով։ «Բատակլան»–ի գրոհի ժամանակ ահաբեկիչներից 2–ը պայթեցրել են իրենց, իսկ մյուսը ոչնչացվել է հատուկ ծառայությունների կողմից:

Ժամը 21:53–ին մահապարտ ահաբեկիչը 3–րդ պայթյունն է իրականացրել Սթադ դե Ֆրանս մարզադաշտից 400 մ հեռավորության վրա:

Հիշեցնենք, որ այս ահաբեկչություններից 12 ժամ անց Փարիզի արվարձաններում կրկին պայթյուններ և կրակոցներ էին հնչել։

7or.am