ՊՊԾ գնդի տարածքում «Սասնա ծռեր» խմբի անդամների հետ գտնվող «Հիմնադիր խորհրդարանի» մամլո խոսնակ Վարուժան Ավետիսյանը ԳԱԼԱ-ին էլ ասաց, որ գիշերը հանգիստ է անցել, ներկայումս էլ խնդիրներ չկան.

«Ներկայումս հանգիստ է վիճակը, ես տեղյակ եմ, որ ճիշտ է՝ երեկ ոստիկանների ու ցուցարարների միջեւ բախում է եղել, բայց, միաժամանակ, նաեւ լուրջ փոխըմբռնման դեպքեր են եղել, եւ եթե այսպես շարունակվի, եղբայրացման միտում կզարգանա, եւ, ի վերջո, կավարտվի ազգային համաձայնությունը»:

Վարուժան Ավետիսյանից հետաքրքրվեցինք, թե ինչ հարաբերությունների մեջ են ՊՊԾ գնդի տարածքում գտնվող ոստիկանների հետ. «Այստեղ արդեն իսկ շատ խիստ մարդկային եւ շատ լավ հարաբերություններ են, դա փաստ է: Ճիշտ է՝ իրենք էլ խուսափում են այդ թեմաներով արտահայտվելուց, բայց զուտ մարդկային հարթության մեջ ամեն ինչ շատ լավ է»,- նշեց «Հիմնադիր խորհրդարանի» մամլո խոսնակը:

Վարուժան Ավետիսյանին հարցրեցինք նաեւ, թե ինչ է կարծում՝ ե՞րբ եւ խնդրի հանգուցալուծման ի՞նչ տարբերակ է հնարավոր.

«Հանգուցալուծման ձեւը կախված է ժողովրդի կամքից, ինքնադրսեւորման ակտիվությունից, պայքարից: Հին հայկական ավանդույթների համաձայն՝ կա մեկօրյա հարսանիք, յոթօրյա հարսանիք եւ 40-օրյա հարսանիք, սա կարծես թե յոթօրյա հարսանիքի ձեւաչափ է: Իմ ենթադրությունն է դա. դրանից հետո կլինի խաղաղ, հանգիստ հանգուցալուծում՝ առանց որեւէ ցնցումների»,- եզրափակեց Վ. Ավետիսյանը:

Մանրամասները՝ ԳԱԼԱ–ում։