Քաղաքական

13.12.2019 16:25


Ներկա փուլում որևէ փաստաթուղթ չի քննարկվում․ ՀՀ ԱԳՆ խոսնակ (տեսանյութ)

Ներկա փուլում որևէ փաստաթուղթ չի քննարկվում․ ՀՀ ԱԳՆ խոսնակ (տեսանյութ)

Հայաստանի Հանրապետությունն ու Ադրբեջանի Հանրապետությունը Լեռնային Ղարաբաղի հակամարտության կարգավորման գործընթացքում որևէ փաստաթուղթ այս պահին չեն քննարկում: «Արմենպրես»-ի փոխանցմամբ՝ այս մասին դեկտեմբերի 13-ին հրավիրված մամուլի ասուլիսի ընթացքում ասաց ՀՀ արտաքին գործերի նախարարի մամուլի խոսնակ Աննա Նաղդալյանն՝ անդրադառնալով Ադրբեջանի ԱԳ նախարար Էլմար Մամեդյարովի տված հարցազրույցին:

«Մենք բազմիցս ենք նշել, որ ներկա փուլում որևէ փաստաթուղթ չի քննարկվում»,-ասաց Նաղդալյանը:

Մամեդյարովը նախօրեին տված հարցազրույցում նշել էր, որ Բրատիսլավայում կայացած վերջին հանդիպման ընթացքում անդրադարձ է կատարվել «Լավրովի պլան»-ին:

Հայաստանի Հանրապետությունն Արցախի անվտանգության երաշխավորն է, և Արցախի անվտանգությունը ենթակա չէ զիջման: Ասաց Աննա Նաղդալյանը:

«Հայաստանի դիրքորոշումը ԼՂ հարցում հստակ ներկայացվել է: Ղարաբաղյան հիմնախնդրի կարգավորման հիմքն Արցախի ժողովրդի ինքնորոշման իրավունքի ճանաչումն է, որը պետք է իրացվի առանց սահմանափակման և հարկադրման: Արցախի ժողովուրդը կարող է որոշել ինքնորոշման ցանկացած տարբերակ: Արցախի ժողովուրդն իրավունք ունի պահպանել և սահմանել իր կարգավիճակը Ադրբեջանի ինքնիշխանությունից, իրավասությունից և տարածքային ամբողջականությունից դուրս: Այն բոլոր առաջարկները կամ մեկնաբանությունները, որոնք չեն ապահովում Արցախի ժողովրդի ինքնորոշման իրավունքի իրացումը, չեն կարող ընդունելի լինել Հայաստանի համար»,-ասաց Նաղդալյանը:

Անդրադառնալով Ադրբեջանի արտաքին գործերի նախարար Էլմար Մամեդյարովի հնչեցրած այն մտքին, թե հասկանալի չէ՝ որն է Հայաստանի համար անվտանգություն հասկացությունը, նշեց, որ Հայաստանի դիրքորոշումն այդ հարցում հստակ է:

«Ադրբեջանը երեք տասնամյակից ավելի ձգվող իր հայատյաց քաղաքականությամբ փաստել է, որ որևէ պարագայում չի կարող ապահովել Արցախի ժողովրդի անվտանգությունը: ՀՀ-ն Արցախի անվտանգության երաշխավորն է, և Արցախի անվտանգությունը ենթակա չէ զիջման: Չի կարող լինել մի իրավիճակ, երբ Արցախի ժողովուրդը մնա առանց պաշտպանության համար անհրաժեշտ անվտանգության գծերի»,-նշեց ԱԳՆ մամուլի խոսնակը:

Այս խորագրի վերջին նյութերը