Այսօր մամլո ասուլիսի ժամանակ ՀԺԿ նախագահ Ստեփան Դեմիրճյանն ասել է, թե մինչև երկրում չկայանան ազատ, արդար և օրինական ընտրություններ, երկիրը կշարունակի հետընթացը։ Ինչ վերաբերում է 2012թ. խորհրդարանական ընտրություններին, նա նշել է, թե դրանցից ակնկալիքներ չի կարելի ունենալ, եթե անցկացվեն նախորդ ընտրությունների նման։ -Այս վիճակը չի կարելի համարել ընդդիմության ձախողումը, այն ամբողջ հասարակության խնդիրն է,-նշել է Դեմիրճյանը։

Երևանի քաղաքապետարանի ավագանու անդամ, երգահան Մարտին Վարդազարյանը, գնահատելով արդեն Երևանի նախկին քաղաքապետ Գագիկ Բեգլարյանի հրաժարականը, «7օր»-ին ասել է, թե այդպիսի յուրաքանչյուր տեղափոխություն, իհարկե, դրամատիկ է. «Ես չէի ասի՝ ողբերգական, բայց դրամատիկ են, և նույնիսկ հեռանկարում սպասելով առաջընթաց, առաջին պահին, իհարկե, դա հետընթաց է, և դա արգելակ է հանդիսանում։ Ամենակարևորն այն է, որ նախատեսված ծրագրերը, որոնք որ կյանքի իրավունք ունեն և պետք է իրականացվեն, կարևորը՝ դրա՛նց վրա չանդրադառնա...»։

Այսօր՝ դեկտեմբերի 24-ին՝ ժամը 17։00-ին, տեղի կունենա ՀՀ գիտատեխնոլոգիական ազգային ակադեմիայի, Հայկական տեխնոլոգիական ակադեմիայի և Էկոլոգիական անվտանտության միջազգային ակադեմիայի համատեղ նիստը, որի ժամանակ ակադեմիկոսներն իրենց կարծիքը կներկայացնեն ՀՌԱՀ-ի որոշման և ԱԼՄ հեռուստաընկերության եթերազրկման կապացությամբ։ Նիստի ավարտին ակադեմիկոսները հանդես կգան համատեղ հայտարարությամբ։