Աշոտ Գրիգորյան. «Ձեզ դիմելու անհրաժեշտությունն առաջացավ «30+1» գործի շուրջ Ձեր հայտարարությունը կարդալուց հետո: Անկեղծորեն զարմացած եմ ձեր ունեցած լկտիության անսահման պաշարի վրա: Ձեր «ծառայությունների» կարգախոսը և շարժիչը միակն է. որքան հայ ժողովրդի համար վատ, այնքան ձեր համար լավ»։

Արման Սահակյան. «Եթե սոցիոլոգիայի դաշտն ունի իր Ահարոն Ադիբեկյանը, ապա քաղաքագետների դաշտն էլ արդեն ձեռք է բերել վարպետ գաջագործ Արմեն Բադալյանին»։

Վարդան Մխիթարյան. «Խոսելով անիմաստ փող ծախսելուց՝ մտքիս է գալիս, օրինակ, Զորի Բալայանին հայկական «նավատորմի» գլուխ կանգնեցնելու շոուն»։

Գեղամ Նազարյան. «Գագիկ Ծառուկյանի հարցազրույցի մեխը հենց այն էր, որ նա հայտարարեց իր կարևոր որոշման մասին՝ նպաստել առողջ ուժերի համախմբմանը, և հիմա դժվար չէ կռահել, որ բոլոր նրանք, ում շահերից չի բխում քաղաքական դաշտի առողջացումը և Հայաստանի ժողովրդավարացումը, սկսելու են քարեր շպրտել ԲՀԿ-ի և Գագիկ Ծառուկյանի ուղղությամբ:»

Էդիկ Անդրեասյան. «ՀԱԿ պայքարը, թվում է, մոտենում է իր տրամաբանական ավարտին: Եթե իշխանությունները շուտափույթ քայլեր չձեռնարկեն, արդեն հայտնի չէ, թե էլ ինչ պետք է մոգոնեն հարթակի տղերքը, որ գլխներին մարդ հավաքեն: Խոսքը վերաբերում է շուրջօրյա հուժկու հանրահավաքների սեզոնը փակվելուց հետո ընկած ժամանակահատվածին»:

Արման Սահակյան. «Ծառուկյանի հաջորդ տրամաբանական քայլը պետք է լինի իրավամբ թարմ, չվարկաբեկված, քաղաքական և հասարակական դեմքերից նոր թիմ ձևավորելը»։

Վարդան Մխիթարյան. «Սերժ Սարգսյանի հույսը մնացել է ընտրակեղծիքը եւ Լեւոն Տեր-Պետրոսյանը: Ահա այսպիսի տխուր պատկեր»։

Հովհաննես Սարգսյան. «Լևոն պապին էլ խելացի մարդ ա, ինձնից շուտ ա նկատել տրամաբանության բացակայությունը, ու առհասարակ ինքնուրույն կամ ընդհանրապես մտածելու անկարողությունը ու հիմա ուզածի պես խաղեր ա տալիս, նույնիսկ էլ ջանքեր էլ չի թափում որակյալ ներկայացում բեմադրելու ուղղությամբ...»։

Էդիկ Անդրեասյան. «Մեր երկխոսողներն իրար արժեն, եւ ցավալի կլինի, որ չհասնեն իրենց մուրազին, այն է` երկխոսվեն վերջացնեն ու մի գեղեցիկ օր հայտարարեն, որ իրենք Հայաստանից ու հայ ժողովրդից այլևս պահանջ չունեն…»

Արման Սահակյան. «Ամեն օր նայելով 02-ի հաղորդագրությունները, կարելի է անընդհատ վերնագրեր ստեղծել` ՀՀԿ-ական այսինչը սպանեց, ԲՀԿ-ական այսինչը գողացավ, ՀԱԿ-ից այսինչը թալանեց, ՀՅԴ-ից այսինչը դանակահարեց, ՄԻԱԿ-ական այսինչը բռնաբարեց կամ բռնաբարվեց»։

Գեղամ Նազարյան. «Մեր երկիրն այսօր այն վիճակում է, որ երկրի ղեկավարը մեկ այլ երկրի առաջնորդին մոտենալիս գրեթե վազում է: Ավելին, նա աստիճաններով ցատկոտում է՝ Ֆրանսիայի նախագահի ձեռքը մեկ վայրկյան ավելի շուտ սեղմելու համար»։

Հրանտ Մարգարյան. «Վերջին քսան տարիներին շատ բաների համար ենք պարտական Արցախի ազատագրական պայքարին: Այն մեզ հպարտություն, ինքնավստահություն և հույս պարգևեց»։

Վարդան Մխիթարյան. «Վիկիլիքսյան վերջին բացահայտումները վկայեցին, թե իրականում ինչի է պատրաստ Տեր-Պետրոսյանը: Նրա ելույթները ևս դա են ապացուցում: Սերժ Սարգսյանի գործողությունները նույնպես վկայում են, որ նա, հանուն իշխանության պահպանման, պատրաստ է «նախաձեռնությունների»»։

Վահան Իշխանյան. «2008-ի շարժումը ժողովրդավարության պարոդիան էր և ծաղրը, ՀՀՇ-ի և Լևոնի ժողովրդավարությունից, ավազակապետությունից, սպանությունից ու կոռուպցիայից խոսելը նույնն է, թե նացիստները հրեասիրությունից խոսեն, որսորդները կենդանիների պաշտպանությունից, մարդասպանները քարոզեն` մի սպանիր, գողերը` մի գողանա»։

Էդիկ Անդրեասյան. «Պարզվում է` Հայաստանում էլ Պուտինի վերադարձից սարսափողներ կան: «Եդինայա Ռոսիա»-ի համագումարը խառնել է վերջիններիս խաղաթղթերը` Պուտինը որ եկավ, վերջ, Քոչարյանին էլ հետն է բերելու: Ուզում ես հարցնել` բա դո՞ւք ինչու եք իրար խառնվել»։

Վարդան Մխիթարյան. «Չի կարելի նույնիսկ մակերեսային գործ ունենալ այն ուժի հետ, որը արտահերթ ընտրությունները ինքնանպատակ է դարձրել՝ շատ լավ հասկանալով, որ չի հասնելու դրան, քանի որ հենց ինքն է վերածվել Սերժ Սարգսյանի իշխանության կայունության երաշխիքի, իսկ ժողովրդին էլ փորձում է օգտագործել իր նպատակների իրագործման համար»։

Գեղամ Նազարյան. «Մենք պետք է հասնենք նրան, որ պետության ղեկավարման ղեկից հազարավոր կիլոմետրերով հեռու մնան նրանք, ովքեր կարծում են, թե ընտրակեղծիքով զբաղվելը, ժողովրդին կեղեքելն ու շանտաժի ենթարկելը շատ նորմալ գործ է»։

Հարութ Սասունյան. «Շոտլանդացի գիտաշխատող Սթիվեն Սիմը նկարագրել էր իր տհաճ տպավորությունները Ադրբեջանի կողմից ներկայումս գրավված պատմականորեն հայկական տարածք հանդիսացող՝ Նախիջևան այցից հետո»։